50-ից ավելի փաստաբան պատրաստվում է գործադուլ հայտարարել դատարանի շենքում՝ փաստաբաններին ապօրինի խուզարկելու հետ կապված:
Հիշեցնենք, որ Դատական դեպարտամենտը այս «պրակտիկան» ներդրեց «Սասնա ծռեր»-ի գործերով նիստերից առաջ: Փաստաբաններին դատարանի շենք մուտք գործելիս կարգադրիչները զննության ենթարկելու փոխարեն փորձում են խուզարկել, տեսնել պայուսակի պարունակությունը: Աղմուկից հետո Փաստաբանների պալատի նախագահն ու Դատական դեպարտամենտի ղեկավարն իբր համաձայնության եկան և իրավական ուժ չունեցող մի փաստաթուղթ հրապարակեցին, որտեղ սահմանված էր, թե ինչպես պետք է զննել փաստաբանին: Բնականբար, դա ևս չէր կարող գոհացնել փաստաբաններին, քանի որ Փաստաբանության մասին օրենքը հստակ սահմանում է, որ փաստաբանը չի կարող խուզարկության ենթարկվել: Մինչդեռ, ՓՊ-ի ու ԴԴ-ի ստորագրած հայտարարության մեջ անգամ փաստաբանին առանձնասենյակ հրավիրել և այդ սենյակում զննելու մասին կետ կար:
«Ապօրինի խուզարկությունները պետք է դադարեցվեն։ Արդեն 50-ից ավելի փաստաբաններ իրենց համաձայնությունն են տվել գործադուլին, կարծում եմ՝ արդեն հարկ է գործուն միջոցների անցնել այդ ուղղությամբ»,- «Առաջին լրատվական»-ի հետ զրույցում ասաց փաստաբան Երվանդ Վարոսյանը:
Գործադուլի մասնակից մեկ այլ փաստաբան Լուսինե Սահակյանն էլ մեզ հետ զրույցում նշեց, որ սա այն դեպքն է, երբ կոպտորեն սկսել են խախտել արդեն փաստաբանների իրավունքները: Խուզարկում են, սանկցիաներ են կիրառում, չեն թողնում դատական նիստին արտահայտվել: «Եվ եթե այս իրավիճակում Փաստաբանների պալատը պետք է չմիանա գործադուլին, արդեն պարզ է, Պալատի նախագահ Արա Զոհրաբյանը պաշտպանո՞ւմ է իր փաստաբաններին, թե՞ ոչ»,- նշեց տիկին Սահակյանը:
Փաստաբան Միհրան Պողոսյանը ևս «Առաջին լրատվական»-ի հետ զրուցում նշեց, որ միանալու է գործադուլին, քանի որ այս վիճակը հանդուրժել այլևս հնարավոր չէ: «Հասկանում ենք, որ ինչ-որ տեղ գուցե ի վնաս մեր պաշտպանյալների որոշումներ կայացվեն, բայց մենք դիմելով այդ ռիսկին, գնում ենք այդ քայլին, քանի որ վիճակն այնպիսին է, որ այլևս հանդուրժել չի կարելի: Հասկանում ենք նաև, որ դատարկ հայտարարություններով խնդիրը լուծում չի ստանալու: Բոլոր դեպքերում, ես ողջունում եմ փաստաբանների այս որոշումը»,- նշեց Պողոսյանը:
Փաստաբան Երվանդ Վարոսյանը նշեց, որ գործադուլի օրը դեռ որոշված չէ: Առաջիկայում կորոշեն և հայտարարությամբ տեղյակ կպահեն: