«Առաջին լրատվական»-ի զրուցակիցն է ՀՀ ժողովրդական արտիստ, Երևանի ՀՀԿ խմբակցության ավագանու անդամ, կոմպոզիտոր Երվանդ Երզնկյանը:
– Պարոն Երզնկյան, «Ելք» խմբակցությունը հանդես է եկել Երևանում հայ բոլշևիկների, կոմունիստ գործիչների անունները կրող փողոցները ազգային հերոսների անուններով վերանվանելու նախաձեռնությամբ։ Առաջարկվում է Երևանի Լենինգրադյան փողոցն անվանակոչել Արցախյան պատերազմի հերոս Լեոնիդ Ազգալդյանի անունով, Սարգիս Կասյանի, Անաստաս Միկոյանի անվան փողոցները վերանվանել ազգային հերոսների անուններով և այլն։ Առհասարակ, չե՞ք տեսնում փողոցներն անվանափոխելու անհրաժեշտություն:
– Օրինակ՝ կարծում եմ՝ Լենինգրադյանը պետք չէ փոխել, Կասյանի հարցում չեմ կարողանում կողմնորոշվել, բայց ինձ համար, երբ փողոցների անուններն են փոխվում, հաճելի չէ: Հասկանում եմ, որ մենք ունենք Մեսրոպ Մաշտոց, և տվյալ դեպքում այդ փողոցի անունը փոխելը ճիշտ էր, բայց Լենինգրադյանը չէի ուզենա, որ փոխվեր: Օրինակ՝ Փարիզում կա Ստալինգրադ փողոց և ոչ ոքի մտքով չի անցնում այն փոխել, քանի որ Ստալինգրադը եղել է, և ոչ ոք չի նայում՝ դա լավ է, վատ է: Տեսեք, քաղաքներ կան, որ հայկական փողոցներ ունեն, հիմա նրա՞նք էլ վերցնեն փոխեն: Բացի այդ, սա տեխնիկապես շատ դժվարությունների հետ է կապված, որովհետև այդ փողոցները մարդկանց անձնագրերում կան, դրանք պետք է փոխվեն:
– Նրանք, ովքեր դավաճաններ են եղել, կազմակերպել են աքսոր, գնդակահարություններ, նրանց անունը կրող փողոցների մասով չունե՞ք մտահոգություններ:
– Կասյանի հետ կապված չեմ կարողանում ճիշտ կողմնորոշվել, քանի որ պատմությունը շատ լավ չգիտեմ, բայց Կասյանը բոլոր դեպքերում փոքրիկ ու կարճ մի փողոց է, և տեխնիկապես հեշտ է անվանափոխություն կազմակերպել, իսկ Լենինգրադյանը՝ ոչ: Միանշանակ չէ վերաբերմունքը, և յուրաքանչյուր փողոցի նկատմամբ պետք է լինի առանձին վերաբերմունք: Այս հարցը ավագանու նիստին պետք է դնենք, քննարկենք, պիտի պատրաստվենք, որովհետև Կասյանի մասին խոսք չկա, միայն Լենինգրադյանի մասին է խոսքը: Նաև պետք է արխիվներն ուսումնասիրել, մասնագետների հրավիրել, ոչ թե եթե մեկն ասում է՝ Կասյանը հանցագործ է, ուրեմն հանենք: Կասյանի մասով դեռ չեմ մտածել, իսկ Լենինգրադյանի դեպքում կտրականապես դեմ եմ: Կասյանի վերաբերյալ փաստերը պետք է ուսումնասիրել:
– «Ելք» խմբակցության ավագանու անդամներից Արայիկ Հարությունյանը դիմել է Տարոն Մարգարյանին՝ Երևանում ներքաղաքային տրանսպորտում երաժշտությունը արգելող գործող օրենքի դրույթը լիարժեք վերականգնելու համար։ Ի՞նչ կարծիք ունեք այս հարցի կապակցությամբ:
– Համամիտ եմ և կարծում եմ՝ դա ճիշտ է: Տրանսպորտում ամեն մարդ իր մտքերով է, իր էմոցիաներով, մեկը տրամադրություն չունի, հարազատ է կորցրել, նստել է տրանսպորտ, և ուրախ երաժշտություն է միացված, էլ չեմ ասում՝ ռաբիս, և այս ամենը իր տրամադրության հետ չեն համընկնում, իսկ նեյտրալ վիճակն ավելի լավ է: Եվ լավ միտք է ընդհանրապես երաժշտություն չմիացնել տրանսպորտում:
– Մահաբեր վերելակներին վերջ կա՞, քաղաքային տրանսպորտի որակի փոփոխության հարցը չի՞ մտահոգում Ձեզ:
– Սրանք մեր առաջնահերթ խնդիրներն են: Առաջինը՝ տրանսպորտը, վերելակները և, կարծում եմ, պետք է ավելացնել նաև աղբը, աղբահանությունը: Ես գիտեմ, տեղյակ եմ, քաղաքապետը մեզ պատմել է, որ իրենք արդեն ահագին գործ են արել, ներդրող են ճարել, որ այդ հարցերը լուծվեն: Սա ամիսների հարց է և արագ լուծում է ստանալու, քաղաքապետը խոսք է տվել, խոսել է փաստերով: Նոր ավագանիներ են, պետք է մտնենք պրոցեսի մեջ:
