Գյումրիի ավագանիում 4 մանդատ ունեցող ԳԱԼԱ («Գաղափարակից լիբերալների ալյանս») կուսակցությունը դադարեցնում է բոյկոտը և սեպտեմբերից կմասնակցի տեղական ինքնակառավարման մարմնի նիստերին: Անցյալ տարվա հոկտեմբերին Գյումրու ավագանու ընտրություններից հետո ՀՎԿ-ն, ԲՀԿ-ն ու ԳԱԼԱ-ն, անհամաձայնություն հայտնելով մանդատների բաշխման գործընթացին, բոյկոտել էին ավագանու աշխատանքը և դիմել էին դատարան: Դատարանում հաջողության չհասնելով՝ երեք ուժերը պայմանավորվել էին, որ ամեն մեկն արդեն ինքն է որոշում բոյկոտը շարունակել-չշարունակելու հարցը:
Որոշ ժամանակ առաջ ՀՎԿ-ն, իսկ երեկ ԳԱԼԱ-ն դադարեցրեցին բոյկոտը: Կասկած չկա, որ նույն որոշումը կկայացնի նաև ԲՀԿ-ն, մանավանդ, որ վերջինիս քաղաքապետի թեկնածու Վարդևան Գրիգորյանն արդեն ԱԺ պատգամավոր է ու Գյումրիի քաղաքային իշխանությունը կուսակցության համար որոշակիորեն կորցրել է հետաքրքրությունը: Գրեթե վստահ ենք, որ ՍԴ վճռից հետո` անկախ դրա բովանդակությունից, ընդդիմության բոյկոտը կդադարեցվի նաև Վանաձորի ավագանիում:
Առհասարակ` բոյկոտը քաղաքական կյանքի ամենաարդյունավետ գործիքը չէ, ու, եթե անգամ էֆեկտ է տալիս, ապա կարճ ժամանակամիջոցի համար: Եթե իշխանությունները թե՛ Գյումրիում և թե՛ Վանաձորում տեղի չտվեցին ընդդիմության բոյկոտի հետևանքով, ապա խնդրի դատական հանգուցալուծումից հետո ընդդիմությունը կանգնում է հստակ երկընտրանքի առաջ` կամ կազմակերպել քաղաքացիական անհնազանդություն, կամ էլ` մասնակցել ավագանու նիստերին: Ավելորդ է նշել, որ նշված երեք ուժերից որևէ մեկը վարքագծով հեղափոխական չէ, ավելին` նրանք չունեն փողոցում միասնաբար գործելու մոտիվացիա: Մյուս կողմից` առանձին քաղաքներում հնարավոր չէ հեղափոխական մթնոլորտ ստեղծել, եթե այդպիսի մթնոլորտ չկա երկրում: Եվ վերջապես` երեք ուժերի Գյումրու և Վանաձորի բոյկոտները մոտիվացվում էին խորհրդարանական ընտրություններով և նպատակ ունեին «տաք» պահել էլեկտորատը: Հիմա չկա նաև այս մոտիվը և շատ ավելի արդարացված է ընդդիմադիրների մասնակցությունն ավագանիների նիստերին:
Գյումրիում ընդդիմությունը թերևս չի կարող ազդել որոշումների կայացման վրա, սակայն կարող է իրականացնել արդյունավետ վերահսկողություն: Վանաձորի ավագանիում ՀՀԿ-ն փոքրամասնություն է և «Լուսավոր Հայաստանի», ԲՀԿ-ի և ՀՎԿ-ի ավագանիները կարող են հասնել անգամ քաղաքապետի հրաժարականին, եթե իրենց սկզբունքներին հավատարիմ մնան: Այ այս հարցում կասկածելու ծանրակշիռ հիմքեր ունենք:
Լուսանկարը` Photolure-ի
