«Հայաստանը փորձում է խաղալ երկու լարի վրա, բայց դրանք միայն փորձեր են։ Իրականում արտաքին քաղաքական հավասարակշռությունը Հայաստանը չի պահում»,- «Առաջին լրատվական»-ի հետ զրույցում ասաց քաղաքագիտության դոկտոր Հայկ Ա. Մարտիրոսյանը՝ անդրադառնալով Վրաստանում Հայաստանի մասնակցությանը ՆԱՏՕ-ի զորավարժություններին։
Մեր զրուցակիցը չի կարծում, որ առաջիկայում Միացյալ Նահանգները Մինսկի ֆորմատից դուրս գործողություններ ծավալի ղարաբաղյան հարցում. «Սպիտակ տանը հիմա մութ ամպեր են կուտակվել և լարումն այնքան մեծ է, որ արտաքին քաղաքականությամբ զբաղվելու հնարավորություն չի լինում։ Կան ներքին կոնֆլիկտներ բարձրաստիճան տարբեր պաշտոնյաների միջև։ Անգամ պետդեպարտամենտի ներսում ամեն բան հարթ չէ և այս պայմաններում կա որոշակի դիսֆունկցիոնալություն, երբ խոսքը վերաբերում է երրորդ կարգի երկրներին։ Իսկ Հայաստանն այլևս չորրորդական երկիր է և չեմ կարծում, թե որևէ մեկն այնտեղ նստած մտածում է զբաղվել Ղարաբաղյան հակամարտությամբ»,- ասաց Հայկ Ա. Մարտիրոսյանը։
