ՀԱԵ Գուգարաց թեմը մտահոգություն է հայտնել Արդվի գյուղի հարակից տարածքում ոսկու հանքի շահագործման նպատակով տարվող ուսումնասիրության աշխատանքների առնչությամբ: Գուգարաց թեմի առաջնորդ Տեր Սեպուհ արքեպիսկոպոս Չուլջյանի հորդորում մասնավորապես ասված է. «Դարեր շարունակ Արդվին, ուր հանգչում է Ս. Հովհան Օձնեցի Հայրապետը, մեր ժողովրդի համար եղել է նվիրական սրբավայր և ուխտատեղի, որտեղ այցելել է յուրաքանչյուր բարեպաշտ հայորդի»: Եթե կողմնակի մարդ կարդա այս հայտարարությունը, թերևս, այն նույնիսկ բնական համարի, որովհետև եկեղեցին, ի վերջո, կոչված է հոգևոր մասունքների պաշտպանությանը:
Բայց հայաստանյան իրականությանը քաջածանոթ մարդկանց մոտ առաջանում են մի քանի հարցեր: Նախ` Արդվի գյուղի հարակից տարածքում ոսկու հանքը շահագործելու նպատակ ունի մի ընկերություն, որը փաստացի պատկանում է խորհրդարանական մեծամասնության ղեկավար Վահրամ Բաղդասարյանին` մի մարդու, որը շարքային կարգավիճակ չունի իշխանության մեջ: Մյուս կողմից` մեզանում եկեղեցին գրեթե երբեք չի հակադրվում իշխանությանը` նույնիսկ երկրի համար բախտորոշ հարցերում: Նույնիսկ կարելի է պնդել, որ հոգևոր վերնախավն ինչ-որ առումով սերտաճած է երկրի քաղաքական-տնտեսական էլիտային: Նույն Սեպուհ արքեպիսկոպոս Չուլջյանը` անտեսելով իր հոգևոր կարգավիճակը, Վանաձորի անցյալ տարվա ընտրությունների ժամանակ բացահայտ իշխանահաճո կեցվածք էր որդեգրել:
Այսօր արքեպիսկոպոսը մարտահրավեր է նետել ՀՀԿ-ի և մարզի ազդեցիկ դեմքերից մեկին` տալով շատ խիստ գնահատականներ: «Այսօր, հանցավոր թողտվությամբ, փորձ է արվում կյանքի կոչել ոսկու հանքի գործարկման խայտառակ ծրագիրը: Դեմ չենք մեր հայրենիքի զարգացմանն ու պայծառությանն ուղղված ազգօգուտ ծրագրերի իրականացմանը, սակայն ոչ սրբություններն ու հոգևոր-մշակութային արժեքների կործանման հաշվին»,- կարդում ենք նրա հորդորում: Գուգարաց թեմից առաջ` Վահրամ Բաղդասարյանի «ոսկու տենդին» հեգնական, արհամարհական արձագանք էր տվել Լոռվա մարզպետը: Այս բոլոր հայտարարությունները մի շղթայի տարբեր օղակներ են և, ըստ էության, արտահայտում են Հայաստանի բարձրագույն իշխանության բացասական վերաբերմունքը Բաղդասարյանի բիզնես նախաձեռնությանը:
Բաղդասարյանը լռում է: Մի կողմից` նա չի կարող բացահայտ պաշտպանել իր բիզնես շահերն Արդվիում, որովհետև սկանդալի առաջին օրերին հրաժարվել է, թե հանքը պատկանում է իրեն, մյուս կողմից` գոնե կարող է բոլորից պահանջել, որպեսզի այս պատմության մեջ չշահարկվի իր անունը: Սակայն Բաղդասարյանը նույնիսկ դա չի անում, իսկ նրա լռությունը նույնիսկ հասկանալի է, որովհետև փորձառու պատգամավորը հասկանում է, որ եթե այսօր «կարմիր լույս» են վառում նրա բիզնեսի առաջ, ապա վաղը, նույն կերպ կարգելվի նրա մուտքը էլիտա: