ՀՀ քաղբանտարկյալների և հալածյալների պաշտպանության կոմիտեի համակարգող Վարդան Հարությունյանի գնահատմամբ, հայաստանյան քրեակատարողական հիմնարկների գերբեռնվածության և դրանց ուղղությամբ քայլեր ձեռնարկելու մասին հայտարարությունները երկու տեսանկյունից կարելի է դիտարկել: Հարությունյանի կարծիքով, դրանք քաղաքական ենթատեքստ ունեն, քանի որ այդ ճանապարհով իշխանությունները կկարողանան գտնել լավագույն լուծումն իրենց համար և ազատ կարձակեն քաղբանտարկյալներին. «Շատ հնարավոր է, որ իշխանությունները ճանապարհներ են փնտրում այդ հարցի լուծման համար»: Մյուս կողմից, ըստ Վարդան Հարությունյանի, Հայաստանում երբեք այսքան շատ կալանավորներ չեն եղել. «Պայմանական վաղաժամկետ ազատ արձակման գործընթացը, ըստ էության, մեր կալանավայրերում խափանված է, հանձնաժողովը թերի է գործում կամ ընդհանրապես չի գործում: Այսօր արդեն ՔԿՀ-ներ կան, որտեղ մարդիկ խցերում հերթով են քնում: Գուցե հենց ա՞յս խնդիրն են ցանկանում այսկերպ լուծել»: