Լուրեր
Շինարարության ծավալները նվազել են. վարկերի տակից ընկերությունները չեն կարողանում դուրս գալ
  • 09:54
  • 2017-08-13
  • Դիտումներ՝ *

1996 թ-ից ի վեր Հայաստանում գործունեություն ծավալող «Էկոպերլիտ» ընկերությունը, որը զբաղվում է շենքերի ջերմային պաշտպանությամբ, ֆինանսական դժվարությունների առջև է կանգնած: Ընկերության  հիմնադիր-ղեկավար Համլետ Հակոբյանը «Առաջին լրատվական»-ի հետ զրույցում նշեց, որ իրենց ընկերությանը  հիմա անհրաժեշտ է մոտ կես միլիոն դոլար գումար, որպեսզի կարողանան ընդլայնել իրենց գործունեությունը, նորագույն սարքավորումներ ձեռք բերել, հները թարմացնել, որպեսզի կարողանան նաև այդ  կերպ բարելավել  իրենց արտադրանքի որակը:

«Մեր մոտ բանկերն այքան բարձր տոկոսադրույքներով են վարկերը տալիս, որ ոչ մեկ չի  կարողանում դրա տակից դուրս գալ: Արտասահմանում նման գործերի համար շատ ցածր տոկոսներով են վարկը տալիս, այնտեղ հիմնականում   2% է կամ առավելագույնը  5% , իսկ մեզ մոտ ամենացածր տոկոսը 12%-ն է կամ 13 %-ը և այն էլ շատ հազվագյուտ դեպքերում, հիմնականում բանկերը  18 – 20%-ով են տալիս, ինչը շատ  մեծ թիվ է կազմում և մարդիկ չեն կարողանում այդ գումարը վերադարձնել: Մենք էլ  ենք վերցրել  ու անընդհատ չենք կարողանում այդ պարտքը մարել, որովհետև նաև շինարարության ծավալներն  են հիմա զգալիորեն ընկել, այլևս այն թափով չեն առաջ ընթանում, ինչ նախկինում էր: Այս հարցով պետք է կառավարությունը զբաղվի, որն էլ չի զբաղվում»,- ասաց  Համլետ Հակոբյանը:

Վերջինիս  պնդմամբ` կառավարության կողմից պետք է պահանջ դրվի բանկերի առջև, որպեսզի նրանք  վերանայեն իրենց տոկոսադրույքները: Այս  հարցով իրենք բազմիցս դիմել են նախկին վարչապետ Հովիկ Աբրահամյանին, սակայն ոչ մի դրական արդյունք, իսկ այն պատճառաբանությունները, որ ներկայացվել է   նախկին վարչապետի կողմից` Համլետ Հակոբյանի դիտարկմամբ` անհիմն են :

«Դեռևս նախորդ կառավարության ժամանակ որոշում էր ընդունվել, որ շենքերի ջերմապահպանության խնդիրները լուծվում են Համաշխարհային բանկի համապատասխան ծրագրերով, բայց ի՞նչ կապ ունի Համաշխարհային բանկը մեր երկրի շինարարական պրոբլեմների հետ. ճիշտ է նրանք օգնում են մեզ ֆինանսական միջոցներով, բայց այդ խնդիրը մեր կառավարությունը պիտի լուծի:

Ես պատրաստվում եմ նաև Կարեն Կարապետյանի մոտ այս խնդիրը  ևս մեկ անգամ բարձրացնել, որովհետև խնդիրներն իրականում շատ լուրջ են»,-ընդգծեց ընկերության հիմնադիրն ու միևնույն ժամանակ հավելեց.«Կառավարությունը պետք է հաշվի առնի, որ շինարարությունը  եղել է մեր արդյունաբերության լոկոմոտիվը և անհրաժեշտ է դրա վրա շատ մեծ ուշադրություն դարձնել ու  համապատասխան քայլեր ձեռնարկել այն կրկին զարգացնելու համար»:

 

Մանրամասները` տեսանյութում:

  • Դիտումներ՝ *