Արարատի և Վայոց Ձորի մարզերի ընդհանուր իրավասության դատարանում Թաթուլ Պողոսյանի նախագահությամբ ավարտվել է Դավիթ Մանվելյանի և Սերգեյ Մարգարյանի գործի դատական քննությունը:
Դատարանն ապացուցված է գնահատել հետևալը:
32-ամյա Դավիթն ու 39-ամյա Սերգեյը քենակալներ են՝ երկու քույրերի հետ են ամուսնացել, իրենց ընտանիքներով ապրում են Մասիս քաղաքի նույն հանրակացարանի տարբեր բնակարաններում:
Երկու տարի առաջ Դավիթն ու Սերգեյը վիճել են կենցաղային հողի վրա, Դավիթը բռունցքով հարվածել է Սերգեյի ձախ աչքին ու ծանր վնաս է պատճառել նրան՝ կուրացրել է այդ աչքը:
Սերգեյը հաշմանդամության երրորդ կարգ է ստացել, իսկ Դավիթը տուժողի առողջությանը դիտավորությամբ ծանր վնաս պատճառելու համար՝ ՀՀ քրեական օրենսգրքի 112 հոդվածի 1-ին մասով, դատապարտվել է 2 տարի 8 ամիս 19 օր ազատազրկման, նրա նկատմամբ պայմանական դատապարտություն է կիրառվել, նշանակվել է 3 տարի փորձաշրջան: Դավիթը պրոբացիայի ծառայությունում հաշվառման է վերցվել 2015 թվականի հոկտեմբերի 2-ից, այսինքն՝ մեղսագրված այս արարքի կատարման պահին՝ 2017 թվականի ապրիլի 10-ին, գտնվել է փորձաշրջանի մեջ:
Ըստ դատական ակտի՝ 2017 թվականի ապրիլի 10 –ին, ժամը 23-ի սահմաններում Սերգեյը, լինելով ալկոհոլի ազդեցության տակ, տանը վիճաբանել է կնոջ հետ: Վերջինս զանգել է մորն ու ասել է, որ ամուսինը վիճում է իր հետ: Մայրը գտնվել է մյուս դստեր, ասել է, թե՝ Դավիթի տանը՝ նույն շենքի մեկ այլ բնակարանում: Մայրը վերցրել է դստերը՝ Դավիթի կնոջը, ու գնացել է մյուս դստեր՝ Սերգեյի կնոջ վիճակը տեսնելու:
Դավիթը, որ այդ ժամանակ տանն էր ու՝ նույնպես ալկոհոլի ազդեցության տակ, կնոջ ու զոքանչի հետևից գնացել է Սերգեյի տուն: Բայց վերջինս դռան շեմին տեսնելով Դավիթին՝ իր աչքը կուրացնողին, չի թողել, որ նա ներս մտնի, հարցրել է՝ ինչո՞ւ է նա եկել իր տուն, պահանջել է հեռանալ:
Դավիթն ու Սերգեյը վիճել են: Սերգեյը մոտեցել, մեկ անգամ ապտակել է Դավիթին ու հայհոյել է: Դավիթն էլ տարել-բերել ու իր աղետաբեր բռունցքով հարվածել է հիմա էլ Սերգեյի աջ աչքին՝ պատճառելով դեմքի աջ կեսի սալջարդ վերք, աջ աչքի սկլերային արյունազեղում, աջ այտորսկրի կոտրվածք՝ առողջության միջին ծանրության վնաս՝ առողջության տևական քայքայումով: Այս հարվածից հետո Դավիթը դուրս է եկել Սերգեյի տանից ու հեռացել է:
Սերգեյը գնացել է նրա հետևից ու շենքի բակում Դավիթին հասնելով՝ գարեջրի դատարկ շշով հարվածել է նրա գլխին՝ պատճառելով առողջության թեթև վնասի հատկանիշներ չպարունակող վնասվածք՝ գլխի քերծվածք: Դավիթը հեռացել է, իսկ Սերգեյն ահազանգել է ոստիկանություն:
Դավիթ Մանվելյանին մեղադրանք է առաջադրվել տուժողի առողջությանը դիտավորությամբ միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 1-ին մասով, իսկ Սերգեյ Մարգարյանին մեղադրանք է առաջադրվել Դավիթին հարվածելու, թեթև վնասի հատկանիշներ չպարունակող վնասվածք պատճառելու համար՝ ՀՀ քրեական օրենսգրքի 118 հոդվածով:
Դավիթն առաջադրված մեղադրանքում իրեն մեղավոր չի ճանաչել:
Նա հայտնել է, որ ինքը զոքանչի ու կնոջ հետևից գնացել է Սերգեյի տուն, քանի որ տանը փոքր երեխա ունեն, ով մոր գնալուց հետո լաց էր լինում, ինքը գնացել է, որ կնոջը տուն բերի, բայց Սերգեյն իրեն ներս չի թողել: Ինքն ու Սերգեյը վիճել են: Սերգեյը հայհոյել է իրեն ու մեկ անգամ ապտակել է, որից իր աչքերից «կայծ է թռել»:
Քանի որ նախկինում Սերգեյին վնասվածք պատճառելու համար ինքը դատվել էր, այդ պատճառով նրա հարվածին չի պատասխանել, գնացել է աներոջ տուն՝ Մարմարաշեն գյուղ: Դեպքից մի քանի օր առաջ ինքը Սերգեյի դեմքին կապտուկ էր նկատել, նրա կինն ասել էր, թե Սերգեյն աշխատանքի վայրում ընկել ու վնասվել է:
Առաջադրված մեղադրանքում իրեն մեղավոր չի ճանաչել նաև Սերգեյը: Նա նշել է, որ երկու տարի առաջ Դավիթը բռունցքի հարվածով արդեն իր մի աչքը կուրացրել էր: Այդ դեպքից հետո իրենց հարաբերությունները վատացել էին:
Դեպքի օրվա երեկոյան ինքը կնոջ հետ վիճել է գումարային հարցերի պատճառով: Կինը զանգել ու մորն ասել է, որ իրենք վիճում են: Զոքանչն ու քենին եկել են իրենց տուն, նրանց հետևից իր տուն է բարձրացել նաև Դավիթը: Ինքը մոտեցել է դռանը, չի թողել, որ Դավիթը ներս մտնի, պահանջել է, որ հեռանա: Հենց ինքը մոտեցել է դռանը, որ նրան ներս չթողնի, Դավիթը բռունցքով խփել է իր առողջ աչքին ու հեռացել է: Ինքը դրանից հետո նրան չի տեսել, շշով նրան չի հարվածել… Դավիթի հարվածից հետո ինքը բուժօգնությւոն չի ստացել, միայն զանգել է ոստիկանություն ու հայտնել է կատարվածի մասին: Կինը դեպքից հետո թրջոցներ է դրել իր աջ աչքին, գլխին: Դավիթը սուտ է ասել՝ իբր ինքը գարեջրի շշով հարվածել է նրան: Դավիթը սուտ է ասել նաև, որ իր դեմքին կապտուկ է տեսել ավելի վաղ, իբր՝ ինքը աշխատանքի վայրում է ընկել, նման բան չի եղել: Դավիթը որտեղ կանգնում է, ասում է. «Դրա մի աչքը հանել եմ, երկրորդ աչքն էլ պիտի հանեմ»:
Տուժողը հայտնել է, թե ցանկանում է, որ Դավիթը ենթարկվի պատասխանատվության:
Սերգեյի քույրը, որ նույն շենքում է ապրում, դեպքից հետո գնացել է եղբոր տուն, տեսել է, որ նրա աջ աչքը արյունոտ է, կապտած, եղբայրն էլ գոռում էր. «Վախ, աչքս հելավ»: Իր տեղեկություններով՝ Դավիթը հաջորդ օրը փորձել է ինքնասպանություն գործել, որ Սերգեյին մեղադրեն…
Դատարանը հաշվի է առել, որ Սերգեյի խնամքին են երեք անչափահաս երեխաներն ու չաշխատող կինը: Սերգեյը երրորդ խմբի հաշմանդամ է:
Դավիթի խնամքին են չորս անչափահաս երեխաներն ու չաշխատող կինը: Դավիթի ու Սերգեյի պատասխանատվությունն ու պատիժը ծանրացնող հանգամանք է դիտվել հանցավոր արարքները ալկոհոլի ազդեցության տակ կատարելը:
Դատարանը Դավիթ Մանվելյանի վերաբերյալ արձանագրել է հանցանք կատարելու ռեցիդիվ:
Դավիթ Մանվելյանը մեղավոր է ճանաչվել դիտավորությամբ տուժողի առողջությանը տևական քայքայումով միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 1-ին մասով, դատապարտվել է 1 տարի 6 ամիս ազատազրկման: Դատարանը վերացրել է Դավիթի նկատմամբ նախորդ դատավճռով կիրառված պայմանական դատապարտությունը, պայմանականորեն նրա չկրած պատժից ներկա պատժին գումարել է 1 տարի 3 ամիս ազատազրկում:
Դավիթ Մանվելյանը վերջին հաշվով դատապարտվել է 2 տարի 9 ամիս ազատազրկման: Պատժի սկիզբը կհաշվվի Դավիթին փաստացի կալանքի տակ առնելու պահից, երբ դատավճիռն օրինական ուժի մեջ մտնի:
Սերգեյ Մարգարյանը մեղավոր է ճանաչվել ՀՀ քրեական օրենսգրքի 118 հոդվածով ու դատապարտվել է տուգանքի՝ 50 հազար դրամի չափով:
