Փաստաբանների պալատի գործող նախագահ Արա Զոհրաբյանը սեպտեմբերին կառաջադրվի որպես պալատի նախագահի թեկնածու: Այդ մասին Ֆեյսբուքի իր էջում գրառում է կատարել Արա Զոհրաբյանը: «2013-2017թթ. իմ նախընտրական ծրագիրը, որը ժամանակին խոստումների գրքույկ էր թվում, հնարավորություն եմ ունեցել բարի ցանկություններից վերածել գործնական իրականության միայն փաստաբանների պալատի աշխատակազմի, փաստաբանական համայնքի մեծամասնության աջակցության և մեր բոլորի համառ աշխատանքի ու ջանքերի շնորհիվ»,- իր էջում գրել է Զոհրաբյանը: Նրա բառերը ծաղր են թվում այն գզվռտոցի ֆոնին, որ վերջին ամիսներին բոլորը տեսնում են Փաստաբանների պալատում: ՓՊ-ն վերածվել է ներքին երկպառակտությունների թատերաբեմի՝ դառնալով նաև քրեական պատմությունների թիրախ:
Զոհրաբյանի պաշտոնավարման տարիներին փաստաբանական ինստիտուտն այնքան է հեղինազրկվել, որ իշխանությունները բացահայտ մարտահրավեր են նետել փաստաբաններին` դատական նիստերից առաջ նրանց խուզարկելով այնպես` ինչպես խուզարկում են հանցագործներին: Փաստաբանական ինստիտուտն այնքան է հեղինակազրկվել, որ դատավորներն անարգել պատժամիջոցներ են կիրառում պաշտպանների դեմ` անգամ հայտարարություն անելու համար: Փաստաբանների մի մասը հարմարվել է ստեղծված իրավիճակին` տարբեր քրեական գործերով գործարքների գնալով դատավորների ու դատախազների հետ, դառնալով կոռուպցիոն սխեմաների մասնակից: Փոքրաթիվ փաստաբանները, ովքեր ներգրավված են աղմկոտ, հասարակական հնչեղություն ունեցող գործերում, ավելի շատ հանդես են գալիս քաղաքական, քան` իրավական դիրքերից: Նրանց վարքագիծը գուցե հարկադրված է, սակայն դարձյալ հարված է հասցնում փաստաբանական ինստիտուտի հեղինակությանը` ստվերելով նրա դատական սուբեկտայնությունը:
Փաստաբանական ուժեղ ինստիտուտն արդարադատության համակարգը կոռումպացված դատական և դատախազական համակարգերի ճիրաններից ազատելու վերջին հույսն էր, նաև անպաշտպան, իրավազուրկ քաղաքացիների վերջին ապավենը: Հիմա` իրավապահ, դատական մարմինների հետ առնչվող մեր հազարավոր քաղաքացիներ այլևս չեն կարող ապավինել փաստաբանների աջակցությանը, որովհետև հենց վերջիններս ունեն պաշտպանության կարիք: Արա Զոհրաբյանի նախագահության տարիներին Փաստաբանների պալատը վերածվեց խորտակվող նավի: Ավտորիտար իշխանության համար սա իդեալական վիճակ է, և նա ամեն ինչ կանի, որպեսզի Զոհրաբյանը շարունակի պաշտոնավարել, եթե նույնիսկ վերջինս նման ցանկություն չունենար:
Լուսանկարը՝ Photolure-ի
