Երևանի քաղաքապետարանի տրանսպորտի բարեփոխումների գործընթացում ամեն ինչ արվելու է հասարակական տրանսպորտի սակագինը չթանկացնելու համար:
Այս մասին լրագրողների հետ հանդիպմանն ասաց Երևանի քաղաքապետի տեղակալ Վահե Նիկոյանը: Նրա խոսքով` այս պահին գնի հաշվարկ խորհրդատուի կողմից չի ստացվել: «Բնական է, որ երթուղային ցանցի վերջնական չափորոշիչների սահմանումից հետո է հնարավոր հաշվել այդ ցանցի իրագործման ծախսերը, և որպես հետևանք նաև ուղևորափոխադրման գինը: Մենք համոզված ենք, որ տրանսպորտի սակագինը չպետք է լինի բարձր կամ ցածր, այն պետք է լինի արդար և հասանելի, և այդ առումով ամեն ինչ անելու ենք, որպեսզի առանց սակագնի բարձրացման, որոշակի կառուցվածքային փոփոխություններով կարողանանք իրականացնել այս բարեփոխումները»,-ասաց նա:
Քաղաքապետի տեղակալի խոսքով` տրանսպորտային բարեփոխումների գործընթացի պարտադիր մաս է կազմելու, սակայն էլեկտրոնային տոմսային համակարգի ներդրումը; «Այն կարևորագույն հիմնական բարեփոխումների բաղադրիչներից մեկն է լինելու»,-հավելեց նա: Վահե Նիկոյանը վստահեցրեց, որ նոր երթուղային ցանցում չեն լինի «ԳԱԶելներ», դրանք փոխարինվելու են միջին և մեծ տեղատարողությամբ ավտոբուսներով:
