«Առաջին լրատվական»-ի զրուցակիցն է ՀԾԿՀ նախագահ Ռոբերտ Նազարյանը:
-Պարոն Նազարյան, երբ հայտնի դարձավ, որ ՀԷՑ-ն իր բաժնետոմսերի գրավադրմամբ պատրաստվում է 160 միլիոն դոլար վարկ վերցնել, փորձագիտական շրջանակներից կարծիքներ են հնչում, որ այս վարկի մարումը կարող է հանգեցնել էլեկտրաէներգիայի սակագնի բարձրացման: Ձեր կարծիքով՝ հիմնավո՞ր են այս մտահոգությունները:
-Ես ձեզ պաշտոնապես և ամենայն պատասխանատվությամբ ասում եմ, որ բաժնետոմսերի այս գրավադրումը որևէ ձևով սակագնի վրա ազդեցություն ունենալ չի կարող: Մենք ՀԷՑ-ի համար հնգամյա ներդրումային ծրագիր ենք հաստատել՝ 201 միլիոն դոլարի: Այդ 201 միլիոն դոլարի ներդրումներն իրենք պետք է կատարեն: Կատարելու համար ֆինանսավորման աղբյուր է պետք: Ֆինանսավորման աղբյուրներից մեկը կարող է լինել վարկը: Իսկ վարկն իրենք պետք է սպասարկեն իրենց շահույթի հաշվին: Վարկը որևէ ձևով սակագնի վրա բեռ դառնալ չի կարող:
-Այսինքն՝ առաջիկա 5 տարվա կտրվածքով, ՀԷՑ-ի նոր վարկի մարումով պայմանավորված, սակագնային բարձրացում չի՞ լինելու:
-Այո, վարկի մարումով պայմանավորված, սակագնի բարձրացում չի լինելու: Վարկը չի կարող բեռ լինել սակագնի վրա:
-Պարոն Նազարյան, իսկ այդ 201 միլիոն դոլարի ներդրումները հիմնականում ո՞ր ուղղություններով են ուղղվելու:
-Ծրագրով կա հաստատված ուղղությունները, կան ներդրումներից ակնկալվող արդյունքները: Ներդրումները հիմնականում ուղղվելու են այն ուղղություններով, հիմնականում այն տեղերում, հատկապես գյուղական համայնքներում, որտեղ լարումները չեն համապատասխանում ստանդարտներին, կբերվեն նորմալ տեսքի: Անջատումների տևողությունը պետք է բերվի նորմալ տեսքի, կորուստներն այդ ներդրումների արդյունքում պետք է իջնեն 8 տոկոսի: Այլ խնդիրներ ևս կան ծրագրով, որոնք չեմ կարող թվարկել:
–Պարոն Նազարյան, բայց մենք տեսնում ենք՝ ՀԷՑ-ը մշտապես խոսում է վնասների մասին: Եվ եթե առաջիկա տարիներին շահույթ չունեն, և նոր վերցված վարկը շահույթի հաշվին հնարավոր չլինի մարել, ի՞նչ է լինելու: Չենք հանգելո՞ւ դրան, որ պետք է սակագնի հաշվին մարվի:
-Ես կարող եմ հետևյալն ասել, որ մենք իրենց սակագնային մարժայում նախատեսել ենք շահութաբերության նորմա: Իրենք պարտավոր են իրենց շահութաբերության նորմայում սպասարկել իրենց վարկային միջոցները սահմանված տոկոսադրույքներով:
–Որպեսզի հստակ լինի՝ նորից հարցնեմ, եթե առաջիկա 5 տարվա մեջ ՀԷՑ-ը դիմի սակագնի բարձրացման հայտով, ՀԾԿՀ-ն կմերժի՞ այդ հայտը:
-Եկեք երկու բան իրար չխառնենք: Սակագինը չի բարձրանա պայմանավորված նոր վերցված վարկի մարումով: Եթե վարկի մարումով հայտ ներկայացավ, այն կմերժվի: Բայց սակագնի հետ կապված հազար ու մի այլ գործոն կա՝ դոլար-դրամ փոխարժեք, էլեկտրաէներգիայի սակագին, որը, երբ մենք նայում ենք, ապա վերջնական սակագինը սպառողի համար բաղկացած է ոչ միայն ՀԷՑ-ի մարժայով, այլ պայմանավորված է կայանների արտադրած էլեկտրաէներգիայի սակագնով, բարձրավոլտ էլեկտրակայանների սակագնով, օպերատորի և հաշվարկային կենտրոնի սակագներով: Այդ բոլորի հանրագումարում է վերջնական սակագին որոշվում, ձևավորվում սպառողի համար:
ՀԳ. Երեկ էներգետիկայի նախարար Աշոտ Մանուկյանը նշել է, որ ՀՀ էներգետիկ համակարգի երկարաժամկետ (մինչև 2036թ) զարգացման ծրագրով Հայաստանում էլեկտրաէներգիայի սակագները չեն բարձրանա, կմնան նույնը: «Փոխվարչապետի և ֆինանսների նախարարի հետ մենք հիմա քննարկում ենք, պայմանականորեն եմ անվանում կայունացման հիմնադրամի ստեղծումը, որը մեզ հնարավորություն կտա պահպանել էլեկտրաէներգիայի սակագներն այն մակարդակի վրա, որի վրա այսօր կա: Բավականին ամբիցիոզ ծրագիր է՝ էլեկտրաէներգիայի սակագները պահպանել մինչև 2036 թվականն այն մակարդակի վրա, որի վրա գտնվում ենք այսօր»,- նշել է նախարարը:
