«Հայաստանում ԵՄ-ի կազմից դուրս գալու վերաբերյալ ձայները առանձնապես բարձր չեն, և դրանք, ըստ էության, պետք է չանհանգստացնեին Մոսկվային կամ Միհրանյանի նման վերլուծաբան կոչվածներին: Բայց ոնց որ թե հակառակն է եղել»,- «Առաջին լրատվական»-ի հետ զրույցում ասաց քաղաքագետ Աղասի Ենոքյանը՝ անդրադառնալով ռուսաստանցի քաղաքագետ Անդրանիկ Միհրանյանի հնչեցրած գնահատականներին:
Նշենք, որ Միհրանյանը գռեհիկ որակումներ է տվել հայաստանցի այն գործիչներին, ովքեր հանդես են գալիս ԵՏՄ-ից Հայաստանի դուրս գալու նախաձեռնությամբ: Միհրանյանը հայաստանցի գործիչներին անվանել է «ապուշ», «դեմագոգ», «պրովակատոր»:
«Դուրս է գալիս, որ ԵՏՄ-ում Հայաստանի մնալն այնքան անբնական է, ԵՏՄ-ն այնքան անհեթեթ կառույց է, որ ստիպված են լինում անգամ այդ ցածր ձայներին պատասխանել: Միհրանյանը բավական լուրջ պրոպագանդիստ է Մոսկվայում, որը փաստում է, որ Մոսկվայում բավական լուրջ անհանգստություն կա ԵՏՄ-ից Հայաստանի դուրս գալու հետ կապված: Բայց Միհրանյանի արձագանքը պարզ դեմագոգիա է՝ իր բերած բոլոր արգումենտներով»,- նկատեց Ենոքյանը:
Նշենք, որ Միհրանյանը որպես փաստարկ բերում է Հայաստանի փակ սահմանները, հարևանների հետ փոխհարաբերությունները: «Դա էլ մի հանգամանք է, որը հաշվի առնելով՝ պետք է ընտրենք մեր տնտեսության զարգացման ուղին: Հայաստանը չի գտնվում Մերձբալթյան երկրների տարածքում կամ Հյուսիսային Եվրոպայի երկրների տարածքում, չունի բարիդրացիական հարաբերություններ իր հարևանների հետ: Այդ հանգամանքները, երևի թե, շատ քաղաքական գործիչների կողմից անտեսվում են»,- ասել է Միհրանյանը:
«Միհրանյանի բերած այս փաստարկները, կրկնում եմ, պարզ դեմագոգիա են: Սա զուտ Հայաստանի իշխանությունների ռուսամետ դիրքորոշման արդյունք է: Այնքան ակնհայտ է, որ Հայաստանը որևէ օգուտ չի ստանում ԵՏՄ-ից, այնքան ակնհայտ է, որ այդ կառույցում շարունակել մնալը անհեթեթ է, դրա համար էլ Մոսկվան այսկերպ փորձում է խլացնել Հայաստանում դրան դեմ արտահայտվողների ձայները»,- ասաց Ենոքյանը:
Մեկ այլ քաղաքագետ՝ Ռուբեն Մեհրաբյանի խոսքով էլ առաջին անգամ չէ, որ Միհրանյանը նման անբռնազբոս որակումներ է տալիս Հայաստանի, հայաստանյան գործիչների հասցեին, ովքեր իր և իր հոգևոր հոր ու կայսրության շահերին դեմ առաջարկություն են անում կամ կարծիք են հայտնում:
«Իսկ հիմա Հայաստանում ԵՏՄ-ից դուրս գալու խոսակցություններ կան, նախաձեռնություն է սկսվել, որը անհանգստացնում է պարոն Միհրանյանի հոգևոր հայրերին, դրա համար էլ նա արտահայտել է այն, ինչը համահունչ է նրա աշխարհայացքին և մտածողությանը»,- ասաց Մեհրաբյանը՝ հավելելով. «Պարզ է, որ Միհրանյանը Հայաստանի հետ ոչ մի կապ չունի: Նա սպասարկել և սպասարկում է Մոսկվայի շահերը Հայաստանում և երբեմն իր գործն անում է Հայաստանի շահերին հակառակ կամ ՀՀ-ի շահերի հաշվին»:
Ռուբեն Մեհրաբյանի խոսքով՝ Հայաստանը որևէ կերպ նրան պատասխանելու անհրաժեշտություն չունի, միակ բանը, որ պետք է անի, դա Միհրանյանի մուտքը Հայաստան արգելելն է: «Եթե Հայաստանի իշխանությունը որևէ բան է ուզում անել այդ ուղղությամբ, միակ անելու բանը դա է: Ի վերջո, ոչ ոք իրավունք չունի դրսից գալու ու Հայաստանում տարբեր քաղաքական գործիչների հասցեին նման արտահայտություններ թույլ տալու՝ իրեն տիրոջ իրավունք վերապահելով: Մնացած ամեն բովանդակային պատասխան Միհրանյանի դեպքում անիմաստ է: Լավագույն պատասխանը կլինի նա, որ Հայաստանը իր ադեկվատ քաղաքականությունը վարի և հնարավորինս արագորեն մաս դառնա քաղաքակիրթ աշխարհին: Թե չէ ապուշն էլ է նա, դեմագոգն էլ, պրովակատորն էլ: Նա է և իր հոգևոր հայրը, որը Կրեմլում է նստած»,- եզրափակեց Մեհրաբյանը:
Քաղաքագետ Ստեփան Գրիգորյանն էլ շատ կարճ արձագանքեց՝ նշելով. «Ես աֆերիստներին չեմ մեկնաբանում»: