Այն պետությունները, որոնք ինչ-որ կերպ կապված են Ռուսաստանի հետ, մտահոգվելու տեղիք ունեն: Կառավարությունում լրագրողների հետ զրույցում նման տեսակետ է արտահայտել ԱԳ փոխնախարար Շավարշ Քոչարյանը՝ խոսելով ՌԴ-ի նկատմամբ ԱՄՆ նոր պատժամիջոցների մասին:
Քոչարյանի ասածը միանգամայն տրամաբանական է՝ չնայած այս հարցում անգամ Հայաստանի իշխանությունը չունի ձևավորված մոտեցում, որովհետև օրեր առաջ ֆինանսների նախարարն, ըստ էության, ասել էր հակառակը:
Իրարամերժ դիրքորոշումների այս շիլաշփոթը պարզ բացատրություն ունի: Եթե ընդունվում է այն, որ ամերիկյան պատժամիջոցները հարվածում են Հայաստանի տնտեսությանը, ապա իշխանության ներկայացուցիչները պարտավոր են ցույց տալ երկրի զարգացման այլընտրանքային՝ եվրասիական ճանապարհից դուրս, զարգազման հնարավորությունները: Նման լուծումներ մեր իշխանավորները չունեն և հաճախ դիմում են կեղծիքի, մանիպուլյացիայի: Իսկ իրականությունն առավել քան տխուր է, որովհետև ամերիկյան նոր պատժամիջոցները հարվածելու են ռուսական տնտեսության հիմքին՝ ըստ էության այն քայքայելով:
Դա չի կարող ուղղակի ազդեցություն չունենալ միայն դեպի Ռուսաստանի շուկան կողմնորոշված մեր տնտեսության վրա: Ռուսաստանի տնտեսությունն արդեն իսկ թևակոխում է տևական ստագնացիայի փուլ: Նման ճգնաժամերի ժամանակ աշխատանքից ազատում են առաջին հերթին միգրանտին՝ պահելով իրենց քաղաքացուն: Դա էլ բերելու է միգրանտների հետհոսք Հայաստան և լրացուցիչ ճնշում աշխատաշուկայի վրա:
Նախորդ պատժամիջոցներին Հայաստանի տնտեսությունը տուժեց այն ժամանակ, երբ ռուսական ռուբլին մոտ երկու անգամ արժեզրկվեց: Դա ազդեցություն ունեցավ հատկապես տրանսֆերտների վրա, ՌԴ բնակչության գնողունակության վրա, իսկ դրանով պայմանավորված՝ Հայաստանից արտահանումների հնարավորությունները սահմանափակվեցին, մեր արտադրանքի մրցունակության կորուստ եղավ:
Տնտեսագետների կանխատեսմամբ՝ նոր պատժամիջոցների ավերիչ հետևանքները հայաստանյան իրականության վրա կզգացվեն մինչև տարեվերջ: Առանց այն էլ Հայաստանում աղքատությունը դարձել է լուրջ մարտահրավեր, հիմա Ռուսաստանից վերադառնալու են հազարավոր մեր հայրենակիցներ՝ համալրելով գործազուրկների ստվար բանակը:
Հայաստանում արժեքային հեղափոխության հեռանկար գրեթե չկա, բայց երկիրը կանգնած է սոցիալական կոլապսի կամ բունտի շեմին: Ժամանակին վարչապետ Տիգրան Սարգսյանը կատակով կամ հեգնանքով ասել էր, որ խրախուսում են արտագաղթը, որ երկրում հեղափոխություն անող չլինի:
«Հեղափոխականները» վերադառնում են՝ գուցե այն վճռականությամբ, որ «արտագաղթելու» ճանապարհ բացեն երկիրն այս վիճակին հասցրածների համար: