Ղրղըզստանում կոչ են արել քաղաքացիությունից զրկել էթնիկ հայ Սուսաննա Եգորյանին, ով, ներկայացնելով Ղրղըզստանը, դարձել է World Next Top Model 2017 գեղեցկության միջազգային մրցույթի հաղթող։ Նրան մեղադրում են այն բանի համար, որ ցուցադրություներից մեկի ժամանակ պոդիում է բարձրացել «Հայաստան» ժապավենով։ Այս մասին հայտնում է rusarminfo-ն։
Ղրղըզստանի պետական պաշտոնյաներից մեկը՝ Տեղեկատվական տեխնոլոգիաների և կապի պետական կոմիտեն ներկայացնող Սաբիր Կայիկովը նույնիսկ կոչ է արել ոչ միայն զրկել քաղաքացիությունից, այլև «սպանել, երբ կգա»՝ մեղադրելով Սուսաննային դավաճանության մեջ։ Նա նման կոչ է արել ֆեյսբուքյան քննարկումներից մեկի ժամանակ։
Մոդելն իր Instagram-ի էջում գրել է, որ չի դավաճանել Ղրղըզստանը, այլ կատարել է Լիբանանում անցկացված մրցույթի պահանջները։
«Եղել են այսպիսի կանոններ. Մի դեպքում պոդիում բարձրանալիս մենք պետք է ներկայացնեինք մեր երկիրը, մյուս դեպքում՝ անձնագրում նշված ազգությունը։ Ինձ և շատ այլ աղջիկների տվել են երկու ժապավեն։ Չեմ հասկանում, թե ինչի համար է այսքան աղմուկը։ Ես իմ երկիրը չեմ դավաճանել»,-գրել է 18-ամյա Սուսաննան՝ նշելով, որ շատերն ասում էին, որ նա արժանի չէ ներկայացնելու Ղրղըզստանը, քանի որ չի հանդիսանում ղրղըզ։
Ավելի ուշ Կայիկովը տեղի 24.kg պարբերականի հետ հարցազրույցում ներողություն է խնդրել Սուսաննային «սպանելու» առաջարկի համար, սակայն նշել է, որ նրան Ղրղըզստանի քաղաքացիությունից զրկել անհրաժեշտ է։
