Լուրեր
Կառանտին հայտարարելու կարիք չկա. գյուղնախարարը՝ Լոռու մարզում դաբաղի առկայության մասին
  • 12:52
  • 2017-08-10
  • Դիտումներ՝ *

ՀՀ գյուղատնտեսության նախարար Իգնատի Առաքելյանը վստահեցնում է, որ Լոռու մարզում դաբաղ չկա: Կառավարության նիստից հետո լրագրողների հետ զրույցում Առաքելյանը նշեց, որ ներկա դրությամբ Սննդի անվտանգության պետական ծառայության և գյուղատնտեսության նախարարության մասնագետները տեղում վերլուծում են իրավիճակը, նմուշառում են իրականացնում: Դիտարկմանը, եթե չկա նմուշառում, ապա ինչի՞ վրա հիմնվելով է գերատեսչությունը պնդում, որ դաբաղ չկա, նախարարը պատասխանեց. «Առաջնային հետազոտությունը ցույց է տվել, որ դա դաբաղ չէ»:

Նա նաև վստահեցրեց, որ անասունների անկում չի եղել: «Կան հիվանդության նշաններ և պարզ չէ՝ դա դաբաղ է, թե՝ ոչ, իսկ կարանտին հայտարարելու խնդիր չկա, որովհետև իրավիճակը համաճարակային չէ», – շեշտեց գյուղնախարարը:

Անդրադառնալով հարցին, թե ինչպե՞ս է վերահսկողություն իրականացվելու, որպեսզի հիվանդացած կենդանիների միսը չվաճառվի, Իգնատի Առաքելյանն ասաց, որ այդ կենդանիներին պատվաստում է կատարվել, այժմ էլ պետք է ուսումնասիրել, թե ինչն է խնդիրը: Նախարարի խոսքով, երբ կլինի պատասխան՝ ՍԱՊԾ-ը համապատասխան հայտարարությամբ հանդես կգա:

  • Դիտումներ՝ *