Պետդեպում հայտարարել են, որ «անընդունելի» են համարում Ռուսաստանի նախագահ Վլադիմիր Պուտինի այցն Աբխազիա։ Այս մասին հայտնում է Reuters գործակալությունը։
Պետդեպի ներկայացուցիչ Հիզեր Նաուերթը կոչ է արել Մոսկվային հարգել Վրաստանի տարածքային ամբողջականությունն ու ինքնիշխանությունը։
Օգոստոսի 8-ին՝ ռուս-վրացական հնգօրյա պատերազմի տարելիցին Պուտինն աշխատանքային այցով ժամանել էր Աբխազիա։
«ԱՄՆ-ը դիտարկում է ՌԴ նախագահ Վլադիմիր Պուտինի այցը Ռուսաստանի կողմից օկուպացված վրացական տարածք Աբխազիա որպես անընդունելի և Ժնևյան միջազգային քննարկումների սկզբունքներին չհամապատասխանող»,-ասվում է հայտարարությունում։
ԱՄՆ-ը կոչ է արել Ռուսաստանին դուրս բերել զորքերը դիրքեր, որոնք նրանք զբաղեցրել են մինչ 2008 թվականի ռազմական գործողությունները, և վերանայել Աբխազիայի և Հարավային Օսիայի ճանաչման հարցը։
Ավելի վաղ ՆԱՏՕ-ում ափսոսանք էին արտահայտել, որ ՌԴ նախագահն այց է կատարել Աբխազիա՝ առանց վրացական իշխանությունների հետ համաձայնեցման։
