Մեկնարկեց ֆուտբոլի Հայաստանի բարձրագույն խմբի 2017/2018թթ. առաջնությունը, որին կրկին մասնակցում են ընդամենը 6 թիմեր: Մեկնարկային խաղում երեկ Հայաստանի գործող չեմպիոն «Ալաշկերտը» Գյումրիում 2:1 հաշվով պարտվեց «Շիրակին»: Պարտվեց Հայաստանի ազգային հավաքականի դարպասապահ Արսեն Բեգլարյանի «շնորհիվ», ում նոր «շեդևրը» զարդարեց մրցաշրջանի մեկնարկը՝ հերթական անգամ խորտակելով «Ալաշկերտին»:
Հիշեցնենք, որ բոլորովին վերջերս Բեգլարյանի «շեդևրների» շնորհիվ Չեմպիոնների լիգայի խաղարկության որակավորման երկրորդ փուլի պատասխան խաղում «Ալաշկերտը» Երևանում 1:3 հաշվով զիջեց Բելառուսի չեմպիոն ԲԱՏԷ-ին: Սոցիալական ցանցերում երեկ քննարկման լայն առարկա էր դարձել Բեգլարյանի կոպիտ սխալը «Շիրակի» դեմ խաղում: «Ինչպե՞ս կարելի է նման սխալ գործել», կամ՝ «Հայաստանի հավաքականի դարպասապահի անթույլատրելի սխալը»՝ զարմացած գրում էին ֆուտբոլասերները: Թե ինչու են ֆուտբոլի երկրպագուները զարմացած՝ դժվար է ասել:
Անկեղծ ասած, կզարմանայինք, եթե Բեգլարյանը սխալ թույլ չտար: Նրա «ջանքերով» Մոնտենեգրոյում տապալվեց Հայաստանի ազգային հավաքականը, «Ալաշկերտը» տապալվեց Չեմպիոնների լիգայի խաղարկությունում, հիմա էլ նրա թիմը անհաջողության մատնվեց Հայաստանի առաջնության մեկնարկային խաղում:
Աբսուրդն այն է, որ այս դարպասապահը թե՛ հավաքականում և թե՛ «Ալաշկերտում» մշտապես մեկնարկային կազմում է: Մշտապես խաղալով մեկնարկային կազմում՝ Բեգլարյանը մշտապես «նվերներ է մատուցում» խաղընկերներին և երկրպագուներին: Ամենեևին չենք զարմանա, եթե Հայաստանի ազգային հավաքականի գլխավոր մարզիչ Արթուր Պետրոսյանը հրավիրի նրան սեպտեմբերի 1-ին կայանալիք աշխարհի առաջնության ընտրական փուլի Ռումինիայի հետ մրցավեճին և նրան խաղացնի մեկնարկային կազմում:
Առեղծվածային այս դարպասապահը իրական պատուհաս է դարձել: Սխալներից ոչ ոքն ապահովագրված չէ, սխալվում են բոլորը: Սխալվում են նաև հանրահայտ դարպասապահները: Բայց երբ սխալները դառնում են սովորական երևույթ, կարծում ենք՝ դարպասապահը պետք է լուրջ հետևություն անի: Դարպասապահը պետք է ինքնասիրություն ունենա և գիտակցի, որ իր սխալներով ոչ միայն իրեն է խայտառակում և նվաստացնում, այլև խաղընկերներին, մարզիչներին, թիմին, երկրպագուներին, վերջապես՝ երկրին: Ֆուտբոլիստ կոչվելը միայն մարզահագուստ և խաղակոշիկներ կրելով չէ: Ցանկացած մասնագիտության տեր մարդ պետք է ունենա գիտակցություն, արժանապատվություն, ինքնասիրություն, ամոթի զգացում: Որքա՞ն կարելի է քայքայել ուրիշների նյարդերը: Մի՞թե այս դարպասապահին հաճելի է, երբ մարզադաշտում նրա հասցեին շարունակ հնչում են վիրավորական արտահայտություններ, նույնիսկ հայհոյանքներ:
Բեգլարյանը Հայաստան՝ Կապանի «Գանձասար» է տեղափոխվել 2011 թվականին «Կրասնոդարի» երկրորդ թիմից: Կարծում ենք՝ ակնհայտ է, որ եթե այս դարպասապահը հեռանկար կամ նորմալ խաղային որակներ ունենար, «Կրասնոդար-2»-ից ոչ թե «Գանձասար» կտեղափոխվեր, այլ, ասենք, Մոսկվայի «Լոկոմոտիվ», Եկատերինբուրգի «Ուրալ» կամ, ինչու չէ, կհայտնվեր «Կրասնոդարի» հիմնական թիմում:
Բեգլարյանն արդեն 6 տարի է՝ խաղում է հայկական տարբեր թիմերում և, շարունակ նվերներ մատուցելով ֆուտբոլասերներին ու խաղընկերներին, դարձել է հայկական ֆուտբոլի «Ձմեռ պապը»: Վստահ ենք, որ շատերը կշարունակեն պնդել, որ այլ դարպասապահ չունենք, և մարզիչները ստիպված են խաղացնում Բեգլարյանին: Վստահաբար կարող ենք ասել, որ Բեգլարյանից ավելի լավ դարպասապահներ կան Հայաստանում: Պարզագույն օրինակ՝ «Գանձասար-Կապանի» դարպասապահ Գրիգոր Մելիքսեթյանը, վստահ խաղ ցուցադրելով Հայաստանի առաջնությունում և Եվրոպա լիգայի խաղարկության որակավորման առաջին փուլի Մոնտենեգրոյի «Մլադոստի» հետ մրցավեճում, հրավիրվեց Իրան՝ պայմանագիր կնքելով «Փարս Ջոնուբի Ջամ» թիմի հետ: Բեգլարյանից անհամեմատ ավելի հաջող է հանդես գալիս «Շիրակի» դարպասապահ Անատոլի Այվազովը:
