Վրաստանի արդարադատության նախարար Տեա Ցուլուկիանին հայտարարել է ցանկացած երկրից Միխեիլ Սաակաշվիլիի արտահանձնումը պահանջելու պատրաստակամության մասին։ Այս մասին հայտնում է վրացական «Առաջին ալիքը»։
«Եթե դա լինի Ուկրաինան, ապա մեզ մոտ ընթացակարգերն ավարտված են, և բոլոր ապացույցները, որոնք մենք ունեինք դեռևս 2014-15թթ, արդեն փոխանցվել են ուկրաինական կողմին։ Ինչ վերաբերվում է այլ երկրների, օրինակ ԱՄՆ-ին, ապա այն դեպքում, եթե նախկին նախագահը որոշի այնտեղ մնալ, մեզ հարկավոր կլինեն այդ երկրների հետ իրավական խորհրդակցություններ, ներառյալ բանակցություններ ու համաձայնագիր արտահանձնման մասին»,-ասել է նախարարը։
Ինչպես ավելի վաղ հայտնել էր Ցուլուկիանին, վրացական դատախազությունը երկու անգամ պաշտոնական հարցում է ուղարկել Ուկրաինային Սաակաշվիլիին արտահանձնելու մասին և երկու անգամ պաշտոնական մերժում ստացել։