Երեկ ՈւԵՖԱ-ն հրապարակել է ակումբային մակարդակով անդամ երկրների վարկանիշային ցուցակը: Այստեղ արտացոլվում են թիմերի ելույթները եվրագավաթների խաղարկությունում: 2017/2018 թթ. խաղարկությունում հայկական թիմերն ընդհանուր առմամբ վաստակել են 0.625 միավոր: Այս ցուցանիշը ՈւԵՖԱ-ի անդամ 55 երկրների շարքում 46-րդն է: Հայաստանից ավելի վատ արդյունք ցույց են տվել Էստոնիան, Ուելսը, Սան Մարինոն, Անդորրան, Կոսովոն և Վրաստանը: Վարկանիշային աղյուսակում այս պահին Հայաստանին զիջում է նաև Ռումինիան և Հունաստանը, սակայն նշենք, որ այս երկրները եվրագավաթների խաղարկությունում ներկայացնում են 5-ական թիմեր և բոլոր թիմերը նոր են սկսել պայքարը: Ընթացիկ խաղարկությունում Հայաստանից ավելի բարձր արդյունք են ցույց տվել Ֆարերյան կղզիներն ու Լյուքսեմբուրգը, որոնք վաստակել են 0.750-ական վարկանիշային միավոր:
Հիշեցնենք, որ մեզ համար ավարտված եվրագավաթների խաղարկությունում որակավորման առաջին փուլի արգելքը հաջողվեց հաղթահարել միայն Հայաստանի չեմպիոն «Ալաշկերտին», որը երկու հանդիպումների արդյունքում 2:1 հաշվով առավելության հասավ Անդորրայի չեմպիոն «Սանտա Կոլոմայի» նկատմամբ: Հայաստանի վարկանիշային միավորների զգալի մասը գոյացել է հենց այս հաղթանակի շնորհիվ: «Ալաշկերտը» մեր երկրին որոշակի վարկանիշային միավորներ պարգևել է նաև Չեմպիոնների լիգայի խաղարկության որակավորման երկրորդ փուլում մրցակցի հարկի տակ՝ ոչ-ոքի 1:1 խաղալով Բելառուսի չեմպիոն Բորիսովի «ԲԱՏԷ»-ի հետ: Մեր թիմերից դրական արդյունք է ցույց տվել նաև Գյումրիի «Շիրակը», որը սեփական հարկի տակ 0:2 հաշվով զիջելով Սլովենիայի «Գորիցիային», պատասխան խաղում ոչ-ոքի 2:2 խաղաց: Նշենք, որ նախորդ տարի Հայաստանը եվրագավաթների խաղարկությունում վաստակել էր 1.125, իսկ 2015/16 թթ. խաղարկությունում 1.625 միավոր:
Ամփոփելով վերջին երեք խաղարկություններում մեր թիմերի ելույթները, կարող ենք ասել, որ անկումը կայուն և հիմնավոր ընթացք ունի: Գաճաճ երկրները հետզհետե շրջանցում են Հայաստանին: Կան բոլոր նախարդյալները, որ հաջորդ տարի մեր ակումբներն էլ ավելի անհաջող ելույթ ունենան եվրագավաթների խաղարկություններում:
Որքան էլ տարօրինակ հնչի, ընթացիկ խաղարկության վարկանիշային ցուցակը գլխավորում է Կիպրոսը: Այս երկրի չորս թիմերին արդեն իսկ հաջողվել է վաստակել 2.850 միավոր: Նշենք, որ Կիպրոսի բոլոր թիմերն այս պահին պայքարի մեջ են: Երկրորդ հորիզոնականում է Իսրայելը՝ 2.750 միավորով: Իսրայելը ներկայացնող 4 թիմերից պայքարը շարունակում են 2-ը: Լավագույն եռյակը 2.500 միավորով եզրափակում է Դանիան, որի բոլոր 4 թիմերը շարունակում են պայքարը:
4-րդ հորիզոնականում է հարևան Ադրբեջանը, որն արդեն ունի 2.375: Սա բավական բարձր արդյունք է: Ադրբեջանական 4 թիմերից պայքարը շարունակում են «Ղարաբաղն» ու «Գաբալան»: Վերջինը Եվրոպա լիգայի խաղարկության որակավորման երրորդ փուլի առաջին խաղում հյուրընկլվելիս 1:0 հաշվով զիջել է Աթենքի «Պանատինաիկոսին» և ունի հնարավորություն որակավորման չորրորդ փուլ դուրս գալու: «Ղարաբաղն» էլ Չեմպիոնների լիգայի խաղարկության որակավորման երրորդ փուլի առաջին խաղում սեփական հարկի տակ ոչ-ոքի 0:0 է խաղացել Մոլդովայի չեմպիոն «Շերիֆի» հետ, ու ևս հնարավորություն ունի որակավորման չորրորդ փուլ դուրս գալու:
Հարևան երկրներից անփառունակ կարելի է որակել վրացական թիմերի ելույթները: Այս երկիրը ներկայացնող բոլոր 4 թիմերը մեկնարկային խաղում անհաջողության են մատնվել: Վրաստանի չեմպիոն «Սամտրեդիան» պայքարը սկսելով չեմպիոնների լիգայի խաղարկության որակավորման երկրորդ փուլից, երկու հանդիպումների արդյունքում 6:0 հաշվով զիջեց «Ղարաբաղին»: Եվրոպա լիգայի խաղարկության որակավորման առաջին փուլում էլ ձախողվեցին Քութաիսի «Տորպեդոն», Բաթումի «Դինամոն» և «Չիխուրան»: Վաստակելով ընդամենը 0.125 միավոր, Վրաստանը վարկանիշային աղյուսակի նախավերջին՝ 54-րդ հորիզոնականում է գտնվում: Վերջին հորիզոնականում է Կոսովոն, որի թիմերը միավոր չեն վաստակել:
