Apple ընկերությունը վաճառքից հանել է iPod Nano և iPod Shuffle նվագարկիչները՝ թողնելով միայն iPod Touch մոդելը՝ 32 և 128 գբ ծավալներով։ Այս մասին փոխանցում է CNet-ը։
Երեկ ընկերության կայքից անհետացել էին երկու նվագարկիչներին առնչվող էջերը և հայտնվել էր վերաուղղորդում դեպի iPod Touch-ի էջ։
Արտադրությունից հանված մոդելները եղել են iPod շարքի վերջին սարքերը, որոնց վրա տեղադրված չի եղել iOS օպերացիոն համակարգը։ Ենթադրվում է, որ iPod Shuffle-ից հրաժարվելը կարող է բացատրվել նաև Bluetooth գործառույթի բացակայությամբ, ինչը թույլ չի տալիս սարքերին միացնել նոր անլար՝ AirPods ականջակալները։ Մոդելներից ոչ մեկը չի աջակցում երաժշտության ու տեսանյութերի ներբեռնման Apple Music առցանց ծառայության աշխատանքին։