Լոռու մարզի Արդվի գյուղի բնակիչներն այսօր վաղ առավոտից փակել են ճանապարհը և բոյկոտել են ոսկու-բազմամետաղային հանքի շահագործման վերաբերյալ ժամը 12։00-ին նախատեսված հանրային լսումները։
Այնտեղ են եղել «Ելք» խմբակցության անդամները: Գյուղի խմելու ջուրը գալիս է այնտեղից, որտեղ ուզում են բացել հանքը: Այդտեղ են գտնվում նաև արոտավայրերը, իսկ գյուղի ապրուստի հիմնական միջոցն անասնապահությունն է: Խնդիրն ունի նաև պատմամշակութային բաղադրիչ, որովհետև գյուղում գործում է 7-րդ դարի եկեղեցի: Ուշագրավ է, որ Լոռու մարզից 3 տարածքային ՀՀԿ-ական պատգամավոր է անցել ԱԺ (մնացած ընտրատարածքներից՝ երկուական): Արդվիցիների և բնության հանդեպ այս հաշվեհարդարը հանրապետականների ինքնատիպ «շնորհակալությունն» է լոռեցիներին։
Սակայն այս պատմության մեջ Հանրապետականի դերակատարությունն այսքանով ոչ թե վերջանում, այլ միայն սկսվում է: Խորհրդարանական մեծամասնության ղեկավար Վահրամ Բաղդասարյանը, ըստ ամենայնի, հոգնել է ծպտյալ օլիգարխիկ կյանքից և որոշել է հետ չմնալ իր ղեկավարած խմբակցության մականունավոր գործարարներից: Դե, այստեղ, խոսքը մեր մեջ, նաև սուբորդինացիայի խնդիր կա. քրեաօլիգարխիայի խմբակցությունը հավուր պատշաճի ղեկավարելու համար Բաղդասարյանը պետք է իր կապիտալը համապատասխանեցնի քաղաքական կարգավիճակին։
Հանքավայրի հնարավոր շահագործողների թվում շրջանառվում է նաև ԱԺ Հանրապետական խմբակցության ղեկավար Վահրամ Բաղդասարյանի անունը, որն առնվազն 30%-ի բաժնետեր է: Վերջինս կտրականապես հերքում է տեղեկատվությունը. «Եթե ասում են, որ ես եմ 30 տոկոս սեփականատեր, թող տան ինձ այդ սեփականությունը: Հանքի շահագործումը նորմալ բան է, բայց այն, որ դա ինձ հետ են կապում, անբարոյականություն է: Բացարձակապես ապատեղեկատվություն է»: Դե, այս հերքումներին պետք է հումորով վերաբերել, որովհետև ստաժավոր հերքող Սամվել Ալեքսանյանը, օրինակ, մինչև հիմա պնդում է, որ առնչություն չունի «Սիթի»-ների հետ: Բայց Ալեքսանյանը թղթով ամեն բան կարգավորել է գլխից, իսկ Վահրամի «ՎաԲա» ՍՊԸ-ի տնօրենն ընդամենը երեկ է ափալ-թափալ հրաժարվել իր 34% մասնակցությունից «ՄԻՌԱՄ» ՍՊԸ-ում։ Պարզ է, որ ոչ մի իրական հրաժարում էլ չի եղել, այլ Բաղդասարյանը՝ տեղեկանալով այսօրվա ակցիայի մասին, փորձել է թղթով «քյասիբ» ձևանալ։
Հիմա, երբ Վահրամ Բաղդասարյանը «գործի» վրա «բռնվել» է, իր իսկ բառապաշարով, հակադարձենք նրան՝ անբարոյականություն է սեփական ընտրատարածքի ու ամբողջ հանրապետության ժողովրդին խաբելը: