ՀՀ արդարադատության նախարար Դավիթ Հարությունյանն այսօր ընդունել է Հայաստանի Հանրապետությունում Ամերիկայի Միացյալ Նահանգների դեսպան Ռիչարդ Միլսին: Ըստ պաշտոնական հաղորդագրության, Ռիչարդ Միլսի ցանկությամբ նախարարն անդրադարձել է նաև նոր հակակոռուպցիոն քաղաքականությանն առնչվող մի շարք հարցերի՝ այդ ուղղությամբ ներդրված ջանքերին և ակնկալվող արդյունքներին: Հանդիպման ավարտին դեսպան Միլսն իր խոսքում նշել է, որ ժողովրդի կարիքներին սատարող արդարադատության համակարգն անկախ ժողովրդավարության կենսական մասն է, և ողջունելով այդ գործընթացում արդարադատության նախարարության ձեռքբերումները, հետագա համագործակցության պատրաստակամություն է հայտնել:
Արդարադատության նախարարները փոխվում են, բայց անփոփոխ է մնում նրանց միջազգային հանդիպումների օրակարգը, ինչը լավագույն վկայությունն է այն բանի, որ Հայաստանում էական, որակական պայքար չկա կոռուպցիայի դեմ, համակարգային բարեփոխումներ չեն կատարվում դատական իշխանության անկախությունն ապահովելու ուղղությամբ։
Հարությունյան-Միլս հանդիպումն ինչ-որ իմաստով ինտրիգային է, որովհետև ԱՄՆ դեսպանը հրապարակավ ափսոսանք էր հայտնել նրա նախորդի՝ Արփինե Հովհաննիսյանի հրաժարականի առթիվ: Այնպես չէ, որ Հովհաննիսյանն աչքի էր ընկել օրինակելի բարեփոխումներով կամ նրա անունը կապվում էր համակարգային մոդեռնիզացիայի հետ, սակայն նրա վարքագծում կրեատիվ ինչ-որ բան կար, նա չէր ասոցացվում համակարգի, քրեաօլիգարխիայի հետ, և այդ հանգամանքն արդեն հույս էր ներշնչում միջազգային գործընկերներին:
Դավիթ Հարությունյանը համակարգի նշանային ֆիգուրներից մեկն է, մարդ, որն ինչ-որ իմաստով կամրջել է Քոչարյանի և Սարգսյանի իշխանությունները, 2008-ի ամենաճգնաժամային շրջանում եղել է ԵԽԽՎ-ում Հայաստանի պատվիրակության ղեկավարը: Թերևս այդ փուլում էլ նա վաստակել է Սերժ Սարգսյանի անվերապահ աջակցությունը: Պատահական չէ, որ նա ամուր դիրքեր ուներ Հովիկ Աբրահամյանի կառավարությունում, իսկ Կարեն Կարապետյանի պարագայում՝ նույնիսկ կարելի է ասել, որ վերահսկում է վարչապետին՝ նախագահի ազդեցությունը կառավարության նկատմամբ ամբողջական դարձնելով: Պատահական չէ, որ բարդ անցումային փուլում Սերժ Սարգսյանը հենց նրան վստահեց արդարադատության նախարարի պաշտոնը: Սա առանցքային նշանակում էր՝ համակարգի կայունությունը պահպանելու նպատակով:
Իր նոր պաշտոնում առաջին հրապարակային քայլով Հարությունյանը դրսևորվեց որպես համակարգային ֆիգուր, առճակատման մեջ մտնելով Հայաստանում ԵՄ պատվիրակության ղեկավար Պյոտր Սվիտալսկու հետ, որը հանդգնել էր դիպչել համակարգի սրբոց-սրբոցին՝ իշխանության ձևավորման մեխանիզմների լեգիտիմությանը:
Հարությունյանը նույնպես հրապարակավ կխոսի կոռուպցիայի դեմ պայքարի անհրաժեշտության մասին, բայց դա իրականում ոչ թե պայքար կլինի, այլ դրա իմիտացիա՝ համակարգը հարվածներից ապահովագրելու նպատակով :