Կարնեգի հիմնադրամի Մոսկվայի կենտրոնի գիտական խորհրդի անդամ, քաղաքագիտության պրոֆեսոր Ալեքսեյ Մալաշենկոն ղարաբաղյան հիմնախնդրի կարգավորման իրական հեռանկարներ առայժմ չի տեսնում:
«Սա այն կոնֆլիկտն է, որը, իմ կարծիքով, հավերժ է՝ համենայնդեպս տեսանելի ապագայում»,- «Առաջին լրատվական»-ի հետ զրույցում ասաց Մալաշենկոն:
Քաղաքագետը որևէ արդյունք չի սպասում Հայաստանի և Ադրբեջանի նախագահների առաջիկա հանդիպումից, որն ըստ նախնական պայմանավորվածության՝ կայանալու է աշնանը: Ալեքսեյ Մալաշենկոն այս պահին ավելի իրատեսական է համարում ռազմական բախումներից խուսափելը, բայց ոչ հիմնախնդրի լուծումը:
«Ես որևէ ակնկալիք չունեմ Սարգսյան-Ալիև հանդիպումից: Սա բազմաթիվ հանդիպումներից մեկն է: Շատ լավ է, որ նման հանդիպումներ են կազմակերպվում: Պարզ է, որ ավելի լավ է՝ բանակցություններ լինեն, քան պատերազմ, բայց առայժմ կարգավորման իրական հեռանկարներ չկան: Բանակցություններ այսօր էլ կան, պարզապես կարգավորման հեռանկարներ չկան: Կա Ղարաբաղը, որն իրեն համարում է անկախ պետություն, և կա Ադրբեջանը, որը կարծում է, թե Ղարաբաղը Ադրբեջանի մի մասն է, և այս հակասությունն առայժմ որևէ լուծում չի գտնում»,- մեկնաբանեց մեր զրուցակիցը:
Իսկ Ռուսաստանը դրակա՞ն, թե՞ բացասական դեր է խաղում ռազմական բախումներից խուսափելու առումով:
Պատասխանելով հարցին՝ քաղաքագետ Ալեքսեյ Մալաշենկոն կարծիք հայտնեց, որ Ռուսաստանը շահագրգռված չէ զինված հակամարտության վերսկսմամբ, որովհետև այդ դեպքում նա ստիպված կլինի ինչ-որ դիրք ընտրել, ոչ թե պարզապես լինել խաղաղարար. «Ռուսաստանն աջակցում է խաղաղության գործընթացին, որը բավական երերուն է: Դա լիովին բավարարում է Ռուսաստանին»: