ՀՀ արտաքին գործերի նախարար Էդվարդ Նալբանդյանի և Արցախի նախագահ Բակո Սահակյանի հանդիպման մեջ որևէ տարօրինակ կամ արտառոց բան չկա, այն նախօրոք ծրագրված է եղել, «Առաջին լրատվական»-ի հետ զրույցում նշեց Արցախի նախագահի աշխատակազմի ղեկավարի տեղակալ Դավիթ Բաբայանը:
«Արցախի Հանրապետության նախագահը պարբերաբար հանդիպում է Հայաստանի ղեկավարության և տարբեր գերատեսչությունների ղեկավարների հետ, մասնավորապես՝ պաշտպանության, արտաքին գործերի նախարարների հետ, և այս հանդիպումը ևս նման կարգի հանդիպում էր: Հանդիպումը որևէ արտառոց դեպքի կապակցությամբ չէր, որևէ հատուկ հարցեր չեն քննարկվել, ընդհանուր հարցեր են քննարկվել մեր հայկական պետությունների համագործակցության վերաբերյալ: Իհարկե, խոսք է գնացել նաև տարածաշրջանում տիրող իրավիճակի, Ղարաբաղյան հակամարտության կարգավորման մասին: Այսպիսով, քննարկվել են այն ավանդական հարցերը, որոնք միշտ քննարկվում են նման հանդիպումների ժամանակ»,- տեղեկացրեց Դավիթ Բաբայանը:
Մեր զրուցակիցը շեշտեց, թե պետք չի Նալբանդյանի և Սահակյանի հանդիպումը կապել Ռուսաստանի և Ադրբեջանի նախագահների՝ Սոչիում կայացած հանդիպման հետ. «Ես տեսնում եմ, որ որոշ տեղեր փորձում են ինչ-որ կապ գտնել Ալիև-Պուտին վերջին հանդիպման հետ: Այդ կապը պարզապես չկա: Այս հանդիպումը ծրագրված էր մինչև Պուտին-Ալիև հանդիպումը, այսինքն՝ պլանային հանդիպում է եղել»:
Զրույցի ընթացքում նախագահ Սահակյանը և նախարար Նալբանդյանը քննարկե՞լ են ԵԱՀԿ Մինսկի խմբի բանակցային գործընթացին Արցախի լիարժեք մասնակցության հարցը:
Պատասխանելով հարցին՝ Դավիթ Բաբայանն ասաց, որ Երևանն ու Ստեփանակերտը, իհարկե, անդրադառնում են այդ հարցին, բայց խնդիրն այն է, որ Ադրբեջանն է խոչընդոտում Արցախի իշխանությունների լիարժեք մասնակցությանը բանակցություններին:
«Միակ կողմը, որը, փաստորեն, խախտել է ձևաչափը, Ադրբեջանն է: Եվ այդ կապրիզը կամ դիվանագիտական ահաբեկչությունը նաև միջազգային հանրությունն է ստիպված կուլ տվել: Բանակցությունների այս ձևաչափը հակասում է ԵԱՀԿ-ի փաստաթղթերին: Այդ ձևաչափը պաշտոնապես հաստատվել է 1994 թ. Բուդապեշտի գագաթնաժողովի ժամանակ: Այդ որոշումն ընդունվել է կոնսենսուսի հիման վրա, այսինքն՝ բոլոր երկրները կողմ էին Մինսկի խմբին: Եթե հիմա ձևաչափը փոխվում է, ապա որոշումը կոնսենսուսի հիման վրա պետք է ընդունվի, բոլոր կողմերը պիտի կողմ լինեն, գագաթնաժողով պետք է լինի»,- ավելացրեց Դավիթ Բաբայանը:
ՀՀ ԱԳ նախարարն Արցախ էր մեկնել հուլիսի 23-ին: Այստեղ նա ներկա է գտնվել Գանձասարի Սուրբ Հովհաննես Մկրտիչ եկեղեցու օծման 777-ամյակին նվիրված տոնական միջոցառումներին։ Նույն օրն արտգործնախարար Նալբանդյանին ընդունել է Արցախի նախագահ Բակո Սահակյանը: Ըստ ՀՀ ԱԳՆ-ի հաղորդագրության, «նախագահ Սահակյանն ու նախարար Նալբանդյանը հանգամանալից զրույց են ունեցել Լեռնային Ղարաբաղի հիմնախնդրի խաղաղ կարգավորման գործընթացն առաջ մղելու նպատակով համապատասխան պայմանների ստեղծման ուղղությամբ Արցախի, Հայաստանի և ԵԱՀԿ Մինսկի խմբի համանախագահ երկրների կողմից ձեռնարկվող ջանքերի շուրջ»: