«Առաջին լրատվական»-ը դեռ շաբաթ օրն էր գրել, որ Սերժ Սարգսյանը մեկնել է արձակուրդ և այն անցկացնելու է Գերմանիայում՝ Բադեն-Բադեն առողջարանային քաղաքում:
Այս մասին պաշտոնական տեղեկությունը տրվեց միայն այսօր: Նախագահի աշխատակազմի հասարակայնության և տեղեկատվության միջոցների հետ կապերի վարչությունը տեղեկացնում է նաև, որ Սերժ Սարգսյանի արձակուրդը կարճատև է:
Այդ ընթացքում նա կընդհատի արձակուրդը և աշխատանքային այցով կմեկնի Իրանի Իսլամական Հանրապետություն՝ մասնակցելու օգոստոսի 5-ին կայանալիք ԻԻՀ նորընտիր նախագահի երդման պաշտոնական արարողությանը:
Նշենք, որ Սերժ Սարգսյանը իր արձակուրդների հիմնական մասն անցկացնում է հենց Բադեն-Բադենում: Նրան այդ ընթացքում ուղեկցում են տարբեր բարձրաստիճան պաշտոնյաներ: Այս տարի, «Առաջին լրատվական»-ի տեղեկություններով, Սերժ Սարգսյանին ուղեկցում է ԱԺ ՀՀԿ-ական պատգամավոր՝ «Ջերմուկ Գրուպ»-ի սեփականատեր Աշոտ Արսենյանը: