Մարտարվեստների բնագավառում Պուտինի ցուցաբերած տաղանդի մասին լեգենդներ են շրջանառվում շնորհիվ Ռուսաստանի ստրկամետ պետական ԶԼՄ-ների, որոնք Պուտինին համարում են ձյուդոյի բարձրակարգ վարպետ:
64-ամյա Պուտինը իսկապես սև գոտի ունի և բազմաթիվ կոչումներ ու պարգևներ: Նա նաև ձյուդոյի մասին մի քանի գրքերի համահեղինակ է, նույնիսկ խաղացել է ուսումնական մարտաֆիլմում, որի վերնագիրն է «Տիրապետենք ձյուդոյին Վլադիմիր Պուտինի հետ միասին»:
Պուտինի երևակայական սպորտային վարպետությունը միանշանակ տեղավորվում է տղամարդկայնության մասին այն պատկերի շրջանակում, որ նա փորձում է ցուցադրել աշխարհին: Բայց իսկապե՞ս Պուտինը մարտարվեստների վարպետ է, ինչպիսին որ նրան ներկայացնում են:
Ո՛չ. ասում է Lawfare ազգային անվտանգության գծով բլոգի խմբագիր Բենջամին Ուիթսը: Ուիթսն ինքը մարտարվեստների երկրպագու է և Պուտինին խաբեբա է համարում: Ավելին, իր ասածը հաստատելու համար նա առաջարկել է Ռուսաստանի ղեկավարին մենամարտել իր հետ, բայց այնպիսի մի վայրում, որտեղ նա հնարավորություն չի ունենա Ուիթսին ձերբակալելու:
Ուիթսն առաջին անգամ Պուտինին մենամարտի է հրավիրել 2015թ., երբ նրա բլոգը դեռևս այդքան հայտնի չէր, այժմ նա երկրորդ անգամ է մենամարտի հրավիրում ՌԴ նախագահին՝ հղում անելով Twitter-ում իրենց հիպոթետիկ ճակատամարտի վերաբերյալ հաղորագրություններին: «Պետք է պատրաստվել այն օրվան, երբ Կրեմլը վերջապես կզանգի»,- գրում է Ուիթսը:
Թեկվանդո և այկիդո մարզաձևերից սև գոտի ունեցող 47-ամյա Ուիթսի խոսքով՝ Պուտինի մենամարտերի տեսագրություններից շատերը կեղծիք են պարունակում: Սովորաբար դրանք սկսվում են մի քանի կադրերից, որտեղ Պուտինը հակառակորդի հետ նախավարժանք է անում մարտից առաջ, այնուհետև անսպասելի գցում է հակառակորդին: Ուիթսը պնդում է, որ նրա հակառակորդները չափազանց թեթև են ընկնում գետնին:
«Համենայն դեպս, այն տեսանյութերում, որ ես եմ նայել, ոչ ոք վստահորեն չի հարձակվում: Ես նույնիսկ չեմ նկատում, որ հակառակորդը ուզում է նրան հաղթել: Պուտինը ցուցադրում է իր ատլետիկ հմտությունը, իսկ հակառակորդները հանուն նրա անում են այն, ինչ ճապոնացիները անվանում են «ուկեմի»՝ պաշտպանական անկում:
Ուիթսը իր ֆեյսբուքում հաղորդագրություն է հրապարակել. «Ինչո՞ւ Վլադիմիր Պուտինը չի ուզում ինձ հետ մենամարտել, որովհետև Պուտինը խաբեբա է. նա մենամարտում է միայն նրանց հետ, ում վրա իշխանություն ունի»:
Ուիթսի խոսքով՝ պուտինյան ցուցադրության մութ կողմն այն է, որ դրա հիմքում Ռուսաստանի առաջնորդի՝ միջազգային արենայում ցուցաբերած ագրեսիվությունն է, ինչպես նաև փոքրամասնություններին և այլախոհներին հետապնդելը սեփական երկրում:
