«Տեղի են ունեցել խորհրդարանական ընտրություններ, մեր երկիրն արդեն խորհրդարանական կառավարման երկիր է: Ով խորհրդարանում ունի մեծամասնություն, նա էլ առաջադրելու է վարչապետի թեկնածությունը: Իհարկե, անձերից շատ բան է կախված, բայց արդեն Հայաստանը անձակենտրոն իշխանություն չունի, որը մեր ժողովրդի վաստակն է: Եվ ժողովուրդը դրա դրական ազդեցությունը տեսավ ընտրություններից հետո, երբ առաջին անգամ պատմության մեջ մարդիկ չհավաքվեցին և չասացին, որ հիմա իրենք հեղափոխություն են անելու: Կարևորը սա է»,-օրերս տված հարցազրույցում անդրադառնալով հարցին, թե ով է լինելու վարչապետի թեկնածուն 2018-ից հետո, պատասխանել էր Սերժ Սարգսյանը:
Արտախորհրդարանական ուժերի համար առավել քան զավեշտալի է Սերժ Սարգսյանի այս հայտարարությունը, քանի որ Հայաստանը եղել է և դեռ կմնա միանձնյա, անձակենտրան կառավարմամբ երկիր: «Ե՛վ այս երկիրը, և՛ ՀՀԿ-ն երբեք ներքին հարց չեն ունեցել: Ամեն ինչ որոշել և որոշում է Սերժ Սարգսյանը: Ավելի ճիշտ՝ մինչև 2008 թվականը որոշում էին Քոչարյանն ու Սերժ Սարգսյանը, իսկ դրանից հետո միանձնյա իշխանություն հաստատվեց, և որոշումները սկսեց կայացնել բացառապես Սերժ Սարգսյանը: Չնայած չի բացառվում, որ պահ գա, և այդ նույն անդեմ ու անողնաշար ՀՀԿ-ն հոշոտի Սերժ Սարգսյանին: Սերժ Սարգսյանը գնաց սահմանադրական փոփոխությունների և ամեն ինչ արեց, որ իր մենիշխանությունը շարունակի: Թե չէ իր ասածները հեքիաթ են, որին անգամ ինքը չի հավատում: Վերջին 10 տարվա մեջ Սերժ Սարգսյանի տված խոստումների, ծրագրերի անգամ մի տոկոսը չի իրականացել»,- «Առաջին լրատվական»-ի հետ զրույցում ասաց «Ժողովրդավարական հայրենիք» կուսակցության նախագահ Պետրոս Մակեյանը՝ հավելելով, որ այս երկրում ՀՀԿ ասվածը, մնացյալ քաղաքական ուժերը սպասարկում և ենթարկվում են այդ մեկ անձի կամքին:
Պետրոս Մակեյանի խոսքով՝ ներկայումս իրապես կոնֆլիկտ, լարում կա Սերժ Սարգսյանի և վարչապետ Կարեն Կարապետյանի միջև: «Սերժ Սարգսյանի քարոզչամեքենան սկսել է Կարեն Կարապետյանի վարկաբեկման գործընթացը տարբեր մեթոդներով՝ տնտեսական ցուցանիշներով, վիճակագրական թվերով, նրա ներդրումային խոստումներով: Կարեն Կարապետյանի վարկաբեկման գործընթացի հանգուցալուծումը կլինի այն, որ իշխանությունները արդեն նախապես հասարակությանը տրամադրած կլինեն նրան, որ վարչապետը խոտանված դեմք է, որին փոխարինելը անհրաժեշտություն է: Այսինքն՝ հիմա Սերժ Սարգսյանը ոչ միայն հող է նախապատրաստում, այլև ոսկերչական ճշգրտությամբ ծրագիր է իրականացնում վարչապետին վարկաբեկելու և քաղաքական գործընթացները իր ցանկալի հունով տանելու համար»,- ասաց Մակեյանը:
Մեր զրուցակցի խոսքով՝ հնարավոր է, որ վարչապետի փոփոխությունը չլինի հենց 2018-ի ապրիլին: Մի քանի ամիս շարունակվի այս աժիոտաժը, որը արդեն սկսված է, որպեսզի հասարակությանը էլ ավելի համոզեն, որ վարչապետի փոփոխությունը անհրաժեշտություն է, որից հետո տեղի կունենա վարչապետի փոփոխություն, և Սերժ Սարգսյանը կզբաղեցնի այդ պաշտոնը:
«Այսինքն՝ դա ընդամենը տեխնիկական խնդիր է: Չնայած ինչ պաշտոն էլ զբաղեցնի Սերժ Սարգսյանը, մեկ է՝ երկրի ներսում բոլոր որոշումները կայացնելու է ինքը՝ միանձնյա»,- եզրափակեց մեր զրուցակիցը:
