ՌԴ նախագահի մամուլի խոսնակ Դմիտրի Պեսկովը տեղեկացրել է, որ այսօր երեկոյան Սոչիում սպասվում է Վլադիմիր Պուտին-Իլհամ Ալիև հանդիպումը: Հատկանշական է, որ այս հանդիպումը տեղի է ունենում ընդամենը մեկ օր այն բանից հետո, երբ Ռուսաստանի ԱԳՆ-ն պաշտոնապես հերքեց, թե տարեվերջին պլանավորել է կազմակերպել Հայաստանի և Ադրբեջանի նախագահների հանդիպումը:
Բանն այն է, որ Մոսկվայում սկզբունքորեն չեն հրաժարվել, այսպես կոչված, «Լավրովի պլանից» կամ այն պայմանավորվածություններից, որ Բաքվի հետ ձեռք էին բերել մինչև 2016թ. ապրիլյան պատերազմը, բայց այդ ծրագրերի իրականացմանը խոչընդոտում է ոչ միայն ու ոչ այնքան Հայաստանը, որքան ռուս-ադրբեջանական հարաբերություններում այժմ առկա ճգնաժամը: Նաև դա է հիմնական խոչընդոտը, որն այս պահին Ալիևին հետ է պահում Արցախում նոր պատերազմ սանձազերծելու գայթակղությունից. ի տարբերություն 2016-ի ապրիլի` Բաքուն չունի Ռուսաստանի քարտ-բլանշը:
Ըստ ամենայնի, Մոսկվայում որոշել են նախ որոշակիացնել իրենց հարաբերությունները Բաքվի հետ, հետո նոր, ռուս-ադրբեջանական հարաբերությունների տրամաբանությունից ելնելով, աշխատանք տանել Հայաստանի հետ, այսինքն՝ զբաղվել ԼՂ խնդրով:
Պուտին-Ալիև այսօրվա հանդիպումը նման է քննիչի ու մեղադրյալի հանդիպման, որի ժամանակ Ալիևը պետք է տա մի շարք հարցերի պատասխաններ՝ կապված «գազային» հարցում Ռուսաստանի ու Ադրբեջանի անողոք մրցակցության և նաև այն ակնհայտ հակառուսական դեմարշների հետ, որոնց վերջին շրջանում մասնակցել է Ալիևը: Մասնավորապես, Ալիևը վերջերս մասնակցում էր Սաուդյան Արաբիայում Իրանի դեմ «արաբական ՆԱՏՕ-ի» կայացմանը նվիրված միջոցառմանը, որն ակնհայտ հակառուսական դեմարշ էր:
Նույնիսկ կարելի է պնդել, որ ԼՂ խնդիրը Պուտին-Ալիև այսօրվա հանդիպման օրակարգում առաջնային չէ և այդպիսին կդառնա միայն այն դեպքում, եթե Ալիևի բացատրությունները Պուտինին բավարարեն, և բացվի ռուս-ադրբեջանական հարաբերությունների «ռեստարտի» հնարավորություն:
Ինչքանով դա իրատեսական կլինի՝ ցույց կտա այսօրվա հանդիպումը, որի ընթացքում Ալիևն իր շողոքորթությամբ անկասկած կփորձի շահել Պուտինի վստահությունը: