Գերմանիան դադարեցնում է Թուրքիայի հետ ռազմական նախագծերը՝ երկու երկրների հարաբերություններում լարվածության պատճառով։ Այս մասին հայտնում է տեղի Bild թերթը՝վկայակոչելով կառավարական աղբյուրները։
Դադարեցումը վերաբերվելու է և՛ իրագործման փուլում գտնվող նախագծերին, և՛ ծրագրվածներին։
Հիշեցնենք, որ Գերմանիայի ԱԳՆ-ն կանչել էր Թուրքիայի դեսպանին՝ Թուրքիայում գերմանացի իրավապաշտպան Պետեր Շտոյնդթների կալանավորման հետ կապված։ Թուրք դեսպանին հայտնել են, որ Շտոյնդթների ու մյուս ակտիվիստների կալանավորումն անընդունելի է։ Գերմանիայի ԱԳ նախարար Զիգմար Գաբրիելը, իր հերթին, հայտնել է, որ Բեռլինը վերանայելու է տնտեսական քաղաքականությունը Անկարայի հանդեպ։ «Չեմ պատկերացնում մաքսային միության ընդլայնման բանակցությունները, քանի դեռ ԵՄ քաղաքացիներն անհիմն կալանավորվում են Թուրքիայում»։
Թուրքիայի ԱԳՆ-ն Գերմանիային մեղադրել է շանտաժի ու սպառնալիքների մեջ՝ նշելով, որ Անկարան կպատասխանի փոխադարձ կերպով։