Շենգավիթ վարչական շրջանի ընդհանուր իրավասության դատարանի ապակեպատ դահլիճում Նելլի Բաղդասարյանի նախագահությամբ պետք է մեկնարկեր 2016 թվականի նոյեմբերի 13-ին «Լիա» գեղեցկության սրահում տեղի ունեցած աղմկոտ սպանությունների գործով առաջին դատական նիստը, սակայն քրեական աշխարհում մականուններով հայտնի ամբաստանյալներին՝ Պետրոս Իսրայելյանին՝ «Չարբախցի Գեղամ» մականունով, Ալիկ Բանդուրյանին՝ «Նորատուսցի Ալիկ» մականունով, կալանավայրից դատարան չէին բերել:
Նախագահող դատավորը ներկայացրեց ոստիկանության պարզաբանումը, թե աշխատանքային ծանրաբեռնվածությունից ելնելով՝ հնարավոր չի եղել դատարանում ապահովել ամբաստանյալների ներկայությունը:
Բանն այն է, որ կալանավորներին դատարաններ ուղեկցող ոստիկանների գերակշիռ մասը այսօր զբաղված էր «Սասնա Ծռեր-2»-ի՝ 18 ամբաստանյալ ունեցող գործով: Բազմիցս մտահոգություն է հնչել, որ «Սասնա Ծռերի» դատական նիստերի օրերին մյուս դատարաններում կալանավորական շատ դատական նիստեր պարզապես չեն կայանում: Առաջիկայում սրա հետևանքով դատարաններում քննվող գործերի կուտակում կարող է առաջանալ, կարող է խախտվել մարդկանց՝ ողջամիտ ժամկետում դատական քննության սահմանադրական իրավունքը…
Այս աղմկոտ գործով ամբաստանյալի աթոռին երեք ամբաստանյալներ են: Բացի վերը հիշատակված մականունավորներից՝ ամբաստանյալի կարգավիճակ ունի նաև Արմեն Գասպարյանը, ով, ըստ մեղադրանքի, հանդիսանալով «Նորատուսցի Ալիկի» մտերիմը և մշտապես ուղեկցելով նրան, հաստատապես տեղեկացել է «Նորատուսցի Ալիկի» օժանդակությամբ ու դրդչությամբ «Չարբախցի Գեղամի», Գևորգ Ավետիսյանի և քննությամբ չպարզված այլ անձանց կողմից, խմբի կազմում դիտավորությամբ Մուշեղ Մուշեղյանի առողջությանը ծանր վնաս պատճառելու մասին, սակայն դրսևորել է հանցավոր անգործություն և նախապատրաստվող ծանր հանցագործության մասին դիտավորությամբ չի հայտնել իրավասու մարմիններին: Արմեն Գասպարյանին մեղադրանք է առաջադրվել ՀՀ քրեական օրենսգրքի 335 հոդվածի 1-ին մասով:
Մյուս երկու ամբաստանյալներին առաջադրված մեղադրանքները ծանր մեղադրանքներ են:
Պետրոս Իսրայելյանը՝ «Չարբախցի Գեղամը», մեղադրվում է խմբի կազմում դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ կետով, իսկ Ալիկ Բանդուրյանը՝ «Նորատուսցի Ալիկը», մեղադրվում է ՀՀ քրեական օրենսգրքի 38-112 հոդվածի 2-րդ մասի 6-րդ կետով՝ տուժողի առողջությանը ծանր վնաս հասցնելուն դրդելու, օժանդակելու համար, ինչի հետևանքով տուժողը մահացել է:
Ըստ մեղադրանքի՝ Նորատուսցի Ալիկը Չարբախցի Գեղամի հետ հեռախոսային խոսակցության ժամանակ «հորդորներ է հնչեցրել» Մուշեղ Մուշեղյանի վերաբերյալ. «Դրան մորթեք, սատկացրեք, մահակներով ոտքերը ջարդեք»: Այսինքն, ըստ մեղադրանքի, դրդել է Մուշեղ Մուշեղյանի առողջությանը ծանր վնաս պատճառելուն և «հորդորելու, շահագրգռելու եղանակով Պետրոս Իսրայելյանի մոտ Մուշեղ Մուշեղյանի նկատմամբ հանցավոր ոտնձգություն կատարելու վճռականություն է հարուցել»:
Ըստ մեղադրանքի՝ Ալիկ Բանդուրյանը դեպքի օրը՝ 2016 թվականի նոյեմբերի 13-ին, հանցավոր խմբին օժանդակել է՝ ծրագրված հանցագործությունը՝ Մուշեղյանի առողջությանը ծանր վնաս պատճառելու գործընթացը հեշտացնելու, այն «անխոչընդոտ» իրականացնելու եղանակով:
Պետրոս Իսրայելյանը՝ «Չարբախցի Գեղամը», ըստ մեղադրանքի, նախնական համաձայնության է եկել Գևորգ Ավետիսյանի ու քննությամբ չպարզված անձանց հետ և Ալիկ Բանդուրյանի օժանդակությամբ իրագործել է Մուշեղ Մուշեղյանի նկատմամբ ծրագրված ոտնձգությունը, սակայն հանդիպել է Մուշեղ Մուշեղյանի զինված դիմադրությանը՝ վերջինս անհրաժեշտ պաշտպանության վիճակում կրակոցներ է արձակել:
Մուշեղյանի դիմադրությունը հաղթահարելու, այդ ժամանակ ծագած՝ Մուշեղյանին սպանելու հանցավոր դիտավորությունը ավարտին հասցնելու նպատակով, ըստ մեղադրանքի, Պետրոս Իսրայելյանը խմբի կազմում Մուշեղյանին ուղղակի դիտավորությամբ սպանել է:
«Լիա» գեղեցկության սրահում կատարված «ռազբորկայի» արդյունքում 25-ամյա Գևորգ Ավետիսյանը՝ Պետրոս Իսրայելյանի բարեկամը, տեղում մահացել է:
38-ամյա Մուշեղ Մուշեղյանն ու 35-ամյա Արամ Պետրոսյանը վնասվածքներով տեղափոխվել են հիվանդանոց, որտեղ Մուշեղ Մուշեղյանը մահացել է:
Պետրոս Իսրայելյանի՝ «Չարբախցի Գեղամի» շահերի պաշտպան, փաստաբան Միհրան Պողոսյանը լրագրողների հետ զրույցի ժամանակ ասաց, որ իր պաշտպանյալը մեղսագրված արարքի համար իրեն մեղավոր չի ճանաչել: Ըստ պաշտպանի՝ առաջադրված մեղադրանքը ակնհայտ անհիմն է, քրեական գործում չկա որևէ ապացույց, որը կհիմնավորեր Պետրոս Իսրայելյանի առնչությունը տեղի ունեցած հանցագործությանը:
Փաստաբան Միհրան Պողոսյանը նշեց, որ Պետրոս Իսայելյանի ու Մուշեղյանի միջև թշնամություն չի եղել: Որևէ փաստական տվյալով չի հիմնավորվել, որ Իսրայելյանի մոտ հանկարծակի ծագել է Մուշեղյանին կյանքից զրկելու դիտավորություն, և նա այդ դիտավորությունն ի կատար է ածել:
Փաստաբանը նշեց նաև, որ կատարվածի հիմքում ֆինանսական տարաձայնություններ չեն եղել, իր պաշտպանյալը որևէ ֆինանսական խնդիր Մուշեղ Մուշեղյանի հետ չի ունեցել, գեղեցկության սրահում ֆինանսական տարաձայնության պարզաբանման համար չեն հավաքվել, և հավաքը Պետրոս Իսրայելյանի կողմից չի կազմակերպվել:
Ալիկ Բանդուրյանը՝ «Նորատուսցի Ալիկը», ևս մեղսագրված արարքի համար իրեն մեղավոր չի ճանաչել: Նրա շահերի պաշտպան, փաստաբան Երեմ Սարգսյանը նույնպես կարծում է, որ իր պաշտպանյալին մեղսագրված արարքը հիմնավորող ապացույցներ գործով ձեռք չեն բերվել:
Երեմ Սարգսյանն ասաց. «Մեղադրանքն ուղղակի աբսուրդ է… Որակումներն ուռճացված են, հնչեղություն ունեցող գործերով ծանր որակումներ են տրվում… Մեղադրանքի առումով նախաքննությունը թերի է…»:
Այս գործով առաջիկա դատական նիստը տեղի կունենա սեպտեմբերի 7-ին: