«Սասնա ծռերի» գործով այսօրվա դատական նիստն ավարտվեց: Դատավոր Արտուշ Գաբրիելյանը սանկցիա կիրառեց երեք փաստաբանների՝ Մուշեղ Շուշանյանի, Նինա Կարապետյանցի եւ Արայիկ Պապիկյանի, ինչպես նաեւ երկու քաղաքացիների նկատմամբ: Վերջիններս դատարանի ներս մտնելիս ոտքի չէին կանգնել, նրանք դուրս հրավիրվեցին դահլիճից: Իսկ փաստաբանների նկատմամբ սանկցիա կիրառվեց խուզարկումից հրաժարվելու համար։
Փաստաբանները բարձրացրեցին նիստերի դահլիճ ջուր բերելու հնարավորություն տալու հարցը, ինչպես նաեւ առաջարկեցին, որ դատավորն ընդմիջում հայտարարելիս տեղեկացնի, թե որքան ժամանակով է հեռանում:
Արտուշ Գաբրիելյանը խոստացավ, որ կհայտարարի ընդմիջումների ժամկետները, իսկ ջուր բերելու մասով հայտարարեց, որ եթե թույլ տա, նիստերի դահլիճը կվերածվի բուֆետի:
Դիտարկմանը, որ կառավարության նիստերի ժամանակ ևս թույլ է տրվում ներկաներին ջուր խմել, դատավորը պատասխանեց՝ ասելով, որ դատարանը հանրային սննդի օբյեկտ չէ:
Հաջորդ դատական նիստը տեղի կունենա հուլիսի 27-ին: