Արցախի Հանրապետության անցումային փուլի համար ընտրված նախագահ Բակո Սահակյանի երդմնակալության արարողությունը կկայանա սեպտեմբերի 7-ին, «Ազատություն» ռ/կ-ին տված հարցազրույցում ասել է ԼՂՀ ԱԺ նախագահ Աշոտ Ղուլյանը:
Նրա ներկայացմամբ՝ սեպտեմբերի 7-ից հետո Արցախի ներկայիս կառավարությունը հրաժարական կտա, 20 օրվա ընթացքում ձևավորվելու է նոր կառավարությունը: Նոր Սահմանադրությամբ Արցախում վարչապետ չի լինելու: Կառավարությունը ղեկավարելու է նախագահը:
«Առաջիկա երեք տարում սպասվում է շատ լուրջ աշխատանք՝ համակարգը հարմարեցնելու, ադապտացնելու սահմանարդությամբ ձևավորված նոր կառավարման համակարգին: Դրա տակ պետական համակարգի բոլոր թևերը իրենց անելիքներն ունեն», – ասել է Ղուլյանը:
Պաշտոնյան նաև տեղեկացրել է, որ երեք տարիների ընթացքում 80-ից ավելի օրենքներ են կամ ընդունելու, կամ եղած օրենքներում փոփոխություններ կատարելու:
«Դրանց նպատակն է լինելու գործող կառուցակարգերը բարեփոխելը», – ասել է Արցախի ԱԺ նախագահը:
Լուսանկարը՝ PanARMENIAN Photo-ի
