«Ձեռքներդ հեռո՛ւ քաշեք ինչպես Արցախից, այնպես էլ Կիպրոսից»: Քաղաքագիտության դոկտոր, պրոֆեսոր Լևոն Շիրինյանի կարծիքով՝ պաշտոնական Երևանը այսպես պիտի պատասխանի Արցախյան խնդրի մասին Թուրքիայի հայտարարություններին:
Քաղաքագետը «Առաջին լրատվական»-ի հետ զրույցում մեկնաբանել է Թուրքիայի արտգործնախարար Մևլութ Չավուշօղլուի վերջին հայտարարությունը ԼՂ հիմնախնդրի կարգավորման վերաբերյալ և ՀՀ ԱԺ փոխնախագահ Էդուարդ Շարմազանովի պատասխանը թուրք նախարարին:
Չավուշօղլուն կոչ էր արել դուրս բերել հայկական զինված ուժերը Ղարաբաղից, ինչին ի պատասխան՝ Էդուարդ Շարմազանովը հայտարարել էր, որ Ադրբեջանի ահաբեկչական քաղաքականությանը աջակցող պետությունը անելիք չունի Արցախյան հիմնախնդրի կարգավորման հարցում: Շարմազանովը նաև ավելացրել էր, որ «անհեթեթ կոչեր անելու փոխարեն՝ ազատեք Կիպրոսը ձեր օկուպացիոն ներկայությունից»:
Որքան էլ արդարացի համարենք Ազգային ժողովի փոխխոսնակի դժգոհությունը Արցախի հարցում Թուրքիայի կողմնակալությունից, այնուամենայնիվ ճի՞շտ է ընդհանրապես նույն հարթության վրա դնել Արցախի և Կիպրոսի խնդիրները:
Պատասխանելով հարցին՝ քաղաքագետ Լևոն Շիրինյանն ասաց, որ արտաքնապես այս երկու հիմնահարցերը ունեն նմանություն, բայց խորքային իմաստով լուրջ տարբերություն կա: Հայերը պատմականորեն կապված են Արցախի տարածքի հետ, իսկ Կիպրոսը հույների հայրենիքն է, ոչ թե թուրքերի: Թուրքերն այստեղ եկվոր են և ինքնորոշվելու իրավունք չունեն:
«Արցախը անընդմեջ, հազարավոր տարիների ընթացքում եղել է հայկական քաղաքակրթական և մշակութային ներկայության տարածք, իսկ հյուսիսային Կիպրոսը հիմք չունի ինքնավար լինելու Կիպրոսի տարածքում: Թուրքերը ներխուժել, տեղավորվել են Կիպրոսի տարածք և թուրքական զինուժի օգնությամբ մնում են այնտեղ: Սրանք իրարից տարբեր խնդիրներ են: Արցախը հայ ժողովրդի համար հայրենիք է, Կիպրոսը որպես հայրենիք հույն ժողովրդինն է: Նույն ձևով ադրբեջանցիներն էին եկվոր Արցախում: Կիպրոսը ի՞նչ հայրենիք է թուրքերի համար: Ի՞նչ գործ ունեն թուրքերը Կիպրոսում, և ի՞նչ գործ ունեն թուրքերը Արցախում:
Որպեսզի դա ասվի, ժողովուրդները պիտի ունենան հազարավոր տարիների մշակութային անընդմեջ ներկայության փաստարկ, ինչը հայկական և հունական կողմն ունեն, իսկ թուրքական կողմը չունի և չի էլ կարող ունենալ: Մենք չենք խոսում այս հարցերի մասին, բայց սա շատ ընկալելի է Արևմուտքում: Կիպրոսում թուրքական համայնքը ինքնորոշվելու որևէ իրավունք չունի: Կիպրոսի թուրքական հատվածը օկուպացիոն գոտի է, իսկ Արցախը ազատագրված տարածք է: Խիստ հակադիր են»,- նշեց Լևոն Շիրինյանը: