«Սասնա ծռերի» 18 անդամներից Թորոս Թորոսյանը դեմ է իրեն հանրային պաշտպան տրամադրելուն, սակայն դատավորը որոշել է նրան տրամադրել հանրային պաշտպան, քանի որ նրա պաշտպան Լիպարիտ Սիմոնյանն արդեն 4-րդ դատական նիստն է՝ չի ներկայանում դատարան։
Այնպիսի տպավորություն է, որ իշխանությունները խնդիր են դրել դատական գործընթացը համալրել հանրային պաշտպաններով, ինչի պատճառով էլ «ծռերի» պաշտպանները ենթարկվում են նվաստացուցիչ խուզարկությունների, կամայական սանկցիաների:
Իշխանության նպատակն ու թիրախներն առավել քան ակնհայտ են: Նման հասարակական հնչեղության գործերով փակ դատավարությունը միայն հարվածելու է իշխանության հեղինակությանը, ուստի իշխանությունը որոշել է հնարավորինս վերահսկելի դարձնել գործընթացը:
Հանրային պաշտպանները, որպես կանոն, ավելի են կախված դատավորներից, դատախազներից, մի խոսքով՝ իշխանություններից: Ըստ ամենայնի, հանրային պաշտպանները լինելու են ոչ թե ամբաստանյալների շահերի պաշտպանը, այլ դատավորին ու դատախազին են պաշտպանելու նրանցից: Թե ինչքանով իշխանությունները կարող են իրականություն դարձնել իրենց սցենարը՝ ցույց կտա ժամանակը, սակայն այսօր արդեն դատավորը հետևողականորեն իրականացնում էր այս գիծը:
Իշխանությունների միակ թիրախը, սակայն, ընթացող դատավարությունները չեն, այլ նաև փաստաբանական ինստիտուտը, որը կառավարելի ու կոռումպացված արդարադատության պարագայում դարձել է պատուհաս իշխանությունների համար: Իշխանությունները որոշել են «հաշիվ մաքրել» այս ինստիտուտից, մանավանդ, որ Փաստաբանների պալատն իրեն արժեզրկում է ներքին սկանդալների ու գզվռտոցի հետևանքով:
Լուսանկարը՝ Photolure-ի
