Հուլիսի 14-ին թուրքական և հայկական լրատվամիջոցները հայտնեցին թուրքական բանտից հայտնի մտավորական Սևան Նիշանյանի փախուստի մասին: Ըստ հրապարակումների՝ նա բանտից դուրս գալու թույլտվություն է խնդրել, ինչը նախկինում էլ է արել, և այդ անգամ չի վերադարձել: Նիշանյանի փախուստից անցել է մեկ շաբաթ, սակայն ՀՀ իշխանությունները, Սփյուռքի նախարարությունը որևէ կերպ չեն արձագանքել հայազգի մտավորականի փախուստին, զորակցություն կամ աջակցություն չեն հայտնել թեկուզ հայտարարությունների մակարդակով:
Հրապարակախոս, վերլուծաբան, արևելագետ Սարգիս Հացպանյանի խոսքերով՝ Հայաստանի Հանրապետության միջամտությունը, աջակցությունը Սևան Նիշանյանին ավելի կբարդացներ վերջինիս վիճակը։ Եթե Նիշանյանը ցանկություն ունենար գալ Հայաստան, ապա ՀՀ-ն նույն օրվանից նրան պետք է ընդուներ և կարգավիճակ տար որպես քաղաքական ապաստանյալի, բայց Նիշանյանը չընտրեց Հայաստան գալու տարբերակը: Նախընտրեց Եվրոպան: Սակայն, Հացպանյանի խոսքերով, Սփյուռքի նախարարությունը պարտավոր էր արձագանքել և իր զորակցությունն ու աջակցությունը հայտներ Նիշանյանին: «Հայաստանի Հանրապետությունը որևէ առնչություն Նիշանյանի հարցում չէր կարող ունենալ: Դա հասկանալի է: Մարդը, անհատը որոշել է փախուստի դիմել և դուրս գալ այդ երկրից: Հայաստանն ամեն դեպքում թուրքին խրտնեցնում է: Բայց Սփյուռքի նախարարությունը ուներ բարոյական պարտք Սևան Նիշանյանի նկատմամբ անելու մի քայլ, գոնե իր բարոյական աջակցությունը հայտնելու»,- «Առաջին լրատվական»-ի հետ զրույցում ասաց Հացպանյանը:
Ինչպես գիտենք, առաջին անգամ, երբ որ Սևան Նիշանյանը ձերբակալվեց ու բանտարկվեց 2014 թվականին, Սփյուռքի նախարարությունը Վիլյամ Սարոյան շքանշանով պարգևատրեց Նիշանյանին, որը մեծ բարոյական աջակցություն էր Նիշանյանին: «Սևան Նիշանյանը ամբողջ Թուրքիայի տարածքում մեր միակ քաղբանտարկյալն է, լուրջ մտավորական: Թուրքիան չունի Սևան Նիշանյանի նման մեկ ուրիշը: 80 միլիոնի մեջ մեկ Նիշանյան կա: Այդ կարգի որոկյալ մարդ թուրք ազգն ինքը չունի: Եվ եթե 2014 թվականին Հայաստանի Հանրապետությունը Սփյուռքի նախարարության անունից Նիշանյանին պարգևատրեց, Կոնստանդնոպոլիսում շատ մեծ երեկո կազմակերպեց, շատ մեծ շուքով մեծարեցին Սևանին, որից նա իրեն շատ լավ էր զգում, որ ի վերջո ինքը հայ է, կա Հայաստան, Սփյուռքի նախարարությունը այդ քայլով կանգնեց իր կողքը: Բայց հիմա Նիշանյանը մեկ շաբաթ է փախուստի մեջ է, Սփյուռքի նախարարությունը անգամ իր գոհունակությունը չի հայտնել, որ իր մեդալ շնորհած անձն ազատության մեջ է: Ավելի բան պետք չէր: Այսքանը բավարար էր: Ես սպասում էի որևէ արձագանքի, բայց նա անուշադրության մատնվեց»,- ընդգծեց Հացպանյանը:
Հիշեցնենք, որ 2014 թվականից բանտում գտնվող հայ մտավորականը ձերբակալվել է իբր թե ապօրինի շինարարության համար, սակայն թե՛ Նիշանյանը, թե՛ նրան սատարողները վստահ են, որ ապօրինի շինարարությունն ընդամենը պատրվակ է, և գործադրված որոշումը քաղաքական է. պոլսահայ լրագրողը հայտնի է Թուրքիայի իշխանությունների նկատմամբ իր կոշտ դիրքորոշմամբ և թուրք ազգայնականների ու պահպանողականների հանդեպ սուր քննադատությամբ:
Սևան Նիշանյանի նկատմամբ Թուրքիան Ինտերպոլով հետախուզում է հայտարարել: Եվ որ երկրում էլ նրան բռնեն, հանձնելու են Թուրքիային, եթե, իհարկե, նա եվրոպական որևէ երկրում քաղաքական ապաստան չստանա: