Կառավարության վաղվա նիստում գործադիրը պատրաստվում է հավանություն տալ 2016 թվականի նոյեմբերի 30-ին Մոսկվայում ստորագրված՝ «Հայաստանի Հանրապետության և Ռուսաստանի Դաշնության միջև Հայաստանի Հանրապետության զինված ուժերի և Ռուսաստանի Դաշնության զինված ուժերի զորքերի (ուժերի) Միացյալ խմբավորման մասին» hամաձայնագիրը վավերացնելու մասին Հայաստանի Հանրապետության օրենքի նախագծին:
Կառավարության կողմից նախագիծը հավանության արժանանալուց հետո այն սահմանված կարգով կուղարկվի Ազգային ժողով:
Հիշեցնենք, որ հուլիսի 14-ին Ռուսաստանի Պետդուման վավերացրեց Ռուսաստանի և Հայաստանի միջև երկու երկրների զինված ուժերի միավորված խմբավորում ստեղծելու պայմանագիրը:
Ռուսաստանի նախագահ Վլադիմիր Պուտինը հայ-ռուսական միացյալ զորախմբի վերաբերյալ համաձայնագիրն ուղարկել է Պետդումա՝ վավերացման հունիսի վերջին:
Զորախումբը պետք է ստեղծվի Հավաքական անվտանգության կովկասյան տարածաշրջանում և նպատակ ունի ժամանակին բացահայտել զինված հարձակման նախապատրաստումները, պաշտպանել ընդհանուր սահմանի ցամաքային հատվածը, մասնակցել հակաօդային, ռադիոէլեկտրոնային և տեղեկատվական ենթակառուցվածքների պաշտպանությանը: Միավորված խմբավորման կազմը կորոշվի լիազորված մարմինների՝ Հայաստանի և Ռուսաստանի պաշտպանության նախարարությունների կողմից՝ ռազմաքաղաքական դրության համատեղ վերլուծության հիման վրա: Պայմանագիրը կնքվել է 5 տարի ժամկետով՝ 5-ամյա ժամկետներով երկարաձգելու հնարավորությամբ:
Ռուսաստանն ու Հայաստանը միացյալ զորախումբ ստեղծելու ուղղությամբ աշխատանքներ են սկսել դեռևս 2016-ի նոյեմբերից։ Այն ժամանակ դեռևս վերլուծաբանները կասկած էին հայտնում, որ որոշում կայացնելիս հավասար իրավունքների դրսևորման ականատես կլինենք։
Չնայած թղթի վրա խոսվում է միացյալ զորամիավորման նկատմամբ Ռուսաստանի ու Հայաստանի հավասար իրավունքների մասին, քաղաքագետները դժվարանում էին պատկերացնել մի իրավիճակ, երբ հայկական կողմն ընդդիմանում է ռուսների որոշումներին։