Ավան և Նոր Նորք վարչական շրջանների ընդհանուր իրավասության առաջին ատյանի դատարանում ՊՊԾ գնդի գրավման մեջ մեղադրվողներից 14-ի գործով արտագնա դատական նիստն ընդմիջվեց երրորդ անգամ:
Առաջին անգամ նիստն ընդմիջվեց փաստաբանների ներկայությունն ապահովելու համար, երկրորդ անգամ՝ բացակա փաստաբանների վերաբերյալ որոշում կայացնելու, երրորդ անգամ՝ փաստաբան Հարություն Բաղդասարյանի նկատմամբ որոշում կայացնելու համար:
Դատական նիստին պաշտպանները խնդրեցին դատավորին լուծել փաստաբան Մուշեղ Շուշանյանի ներկայությունն ապահովելու հարցը, որը, ըստ պաշտպանների, խուզարկությունից հրաժարվելու համար է։ Դատավորը խոստացավ այդ հարցը լուծել, սակայն խորհրդակցական սենյակից վերադառնալուց հետո դատական սանկցիա կիրառեց Մուշեղ Շուշանյանի նկատմամբ՝ պատասխանատվության ենթարկելու վերաբերյալ դիմում ներկայացնելով Փաստաբանների պալատ:
Նույն սանկցիան կիրառվեց նաև փաստաբան Արայիկ Պապիկյանի նկատմամբ: Փաստաբան Տիգրան Հայրապետյանն ասաց, որ դատարանն անօրինական որոշում է կայացնում այն դեպքում, երբ պաշտպանները դատարանի շենքում են և փոխանակ նրանց ներկայությունն ապահովվի նիստերի դահլիճում՝ սանկցիաներ է կիրառում: Իր կարծիքն արտահայտելու և դատարանի որոշումների դեմ առարկություններ ներկայացնելու հնարավորություն չստացավ նաև պաշտպան Ինեսսա Պետրոսյանը. «Պարոն Պետրոսյան, նստեք…»,-ասաց դատավորը:
Առանց դատարանի թույլտվության խոսելու համար նախազգուշացում ստացավ նաև Պավլիկ և Արայիկ Մանուկյանների պաշտպան Հարություն Բաղդասարյանը, սակայն վերջինս փորձեց արտահայտել իր առարկությունները: Արտուշ Գաբրիելյանն ասաց, որ դատարանը գնում է խորհրդակցական սենյակ փաստաբանի վարքագծի վերաբերյալ որոշում կայացնելու համար:
Լուսանկարը՝ Photolure-ի