«Շատ ավելի արդյունավետ կլիներ ընդվզումն այլ ուղղությամբ։ Այսինքն՝ ոչ թե սխալ համակարգերին հարվածելու, այլ բարձրացնելու, նոր շինարարություն իրականացնելու։ Եթե դուք որևէ սխալ բան ուզում եք քանդել, ապա ճիշտը ոչ թե դրան հարվածելն է, այլ հարևանությամբ ավելի լավը կառուցելը»,- անդրադառնալով «Սասնա ծռերի» գործողություններին և դրանց արդյունավետությանը, «Առաջին լրատվական»-ի հետ զրույցում ասաց «Հոգևոր Հայաստան» նախաձեռնության աջակից Աշոտ Մանուչարյանը։
Մեր զրուցակիցն ասաց, որ այսօրվա Հայաստանում պետք է անցումն անցնցում ապահովվի. «Ժիրայրն ու իր ընկերները՝ սկսած Շանթից, Գառնիկ Մարգարյան, Խաչիկ Ավետիսյան, Վովա Առաքելյան՝ այդ շրջանակը մի տրամաբանության մեջ էին։ Ընդզվման այս կամ այն վիճակը հարմարացրեցին այդ խնդիրներին, և սա դառավ այս երկրի համար դրական միտում՝ ընդվզումն առկա է ժողովրդի մեջ, բայց մյուս կողմից բացասական մի բան՝ սա երկրի կարևորագույն ներուժն էր։
Մանուչարյանն առաջարկ է արել Զարուհի Փոստանջյանին, Արտակ Զեյնալյանին, Տիգրան Եգորյանին. «Ասացի՝ հրավիրում եք մարդու իրավունքների պաշտպաններին, հասարակական գործիչներից մի համախումբ, ու սկսում ժողովրդական լսում։ Թող գան, ու մենք լսենք դրդապատճառները։ Ու մենք կլսենք հետևյալը՝ եղել է Մարտի 1, գնդակահարել են մարդկանց, վառել են ավտոմեքենաներ, կողոպտել են խանութներ ու դա որակել ընդդիմությանը։ Թող այս ամբողջը բացահայտեն ու ասեն՝ ծածկել են ու սրա համար ոչ ոք պատասխան չի տվել»։
Հարցազրույցն ամբողջությամբ՝ մեր տեսանյութում
