Արարատյան դաշտի ստորերկրյա ջրերի գերօգտագործումը հանգեցրել է հողերի էրոզիայի, նաև հարակից մի շարք համայնքներ մնացել են առանց արտեզյան ջրի:
Արտեզյան ջրաշերտի կտրուկ նվազումը վկայում է այն մասին, որ Արարատյան դաշտի ստորերկրյա ջրերի արտահոսքը գերազանցում է դրանց վերականգնումը: Այսօր այսպիսի մտահոգություններ հնչեցին «Ջրային ռեսուրսների մասնակցային և արդյունավետ օգտագործում» ծրագրի մեկնարկի ժամանակ, որի ընթացքում Արարատյան դաշտի 12 համայնքների հետ փոխըմբռնման հուշագիր ստորագրվեց: Վեդի, Փոքր Վեդի, Բերքանուշ, Այգավան, Ակնալիճ, Եղեգնուտ և մի շարք այլ համայնքներ ընտրվել են, որպեսզի ջրային ռեսուրսների մասնակցային կառավարման արդյունքում վերականգնեն իրենց համայնքների ջրային պաշարները:
Բնապահպանության նախարար Արծվիկ Մինասյանի տվյալներով, օրենքի համաձայն՝ Արարատյան դաշտի ստորգետնյա ջրերի վերականգնվող պաշարները 1,1 մլրդ խմ է, այսօր օգտագործվում է 1 մլդ 670 մլն խմ:
Նախարարի խոսքով՝ ճիշտ է, սա անցյալ տարվա սեպտեմբերի տվյալներն են, և կառավարությունն արդեն մի շարք գործողություններ է սկսել, այդուհանդերձ, այդ խնդիրը Արարատյան դաշտավայրում կա:
Արծվիկ Մինասյանի խոսքով՝ դրանից 810 մլն խմ-ն ձկնաբուծարանների համար օգտագործվող ստորգետնյա ջրերն են. «Սա մեր գլխավոր խնդիրներից մեկն է, առնվազն կիսով չափ այն պետք է նվազեցվի և արդյունավետ օգտագործման համակարգ ներդրվի»:
Մանրամասները՝ տեսանյութում: