Բուհերի ընդունելության քննությունների արդյունքներն ամփոփված են, և նախօրեին փակցվեցին նաև ցուցակները: Հրապարակված ցուցակներից հասկանալի է դառնում, որ պետական բուհերում վճարովի ուսուցման համակարգում առկա են բազմաթիվ թափուր տեղեր, որոնց մասով լրացուցիչ մրցույթ կհայտարարվի, և նոր ընդունելություն կկազմակերպվի:
Սա, ըստ էության, ևս մեկ հարված է մասնավոր բուհերին, քանի որ պետական բուհերում իրականացվող ընդունելությունից հետո չընդունված շատ դիմորդներ դիմում էին հենց մասնավոր բուհեր, թեև մասնավորում ևս արդեն մի քանի տարի է՝ ընդունելությունն իրականացվում է միասնական քննություններով: Հիմա, սակայն, լրացուցիչ խոչընդոտներ են ստեղծվելու մասնավորի համար, քանի որ չընդունված դիմորդներից շատերը կնախընտրեն կրկին դիմել պետական բուհ, ոչ թե մասնավոր: Դրա հետևանքով այս տարի մասնավոր բուհեր ընդունվել են չափազանց քիչ թվով դիմորդներ: Որոշ մասնավոր բուհերում դիմորդների թիվն անգամ 5-ի չի հասնում, իսկ առավելագույնը եղել է 100 դիմորդ:
Երևանի Հյուսիսային համալսարանի ռեկտոր Բորիս Մակիչյանի խոսքերով՝ սա հատուկ ծրագիր էր, որը մշակվեց «աշոտյանական իշխանության կողմից», և որի նպատակը մասնավոր բուհերին հարվածելն էր:
«Վերջին տարիներին և այս տարի նույնպես Հայաստանի բուհերի ընդունելությունը կազմակերպվում է օրենքի կոպտագույն խախտումներով: Մասնավորապես ոտնահարվում է բարձրագույն կրթության մասին օրենքի 6-րդ հոդվածը, որտեղ շեշտված է, որ ընդունելությունը բուհի իրավասությունն է: Բայց միասնական քննությունները կազմակերպում է ԳԹԿ-ն, կառավարությունը։ Ստացվում է, որ բուհի իրավունքները ոտնահարվում են: Մասնավոր բուհերը աշխատում են օրենքի կոպտագույն խախտման պայմաններում՝ սկսած աշոտյանական իշխանություններից: Այսօր արդեն մասնավոր բուհերի ընդունելությունը վտանգված է»,- «Առաջին լրատվական»-ի հետ զրույցում ասաց Մակիչյանը:
Այս տարի, Մակիչյանի խոսքով, Հյուսիսային համալսարան ընդունվել է 100-ից պակաս ուսանող, իսկ երբ քննությունները միասնական չէին կազմակերպվում, իրենք 500-600, տարի է եղել՝ նաև 700 դիմորդ են ունեցել:
Բորիս Մակիչյանը, սակայն, վտանգավոր չի համարում ստեղծված վիճակը մասնավոր բուհերի համար, քանի որ, նրա խոսքերով, վաղ թե ուշ, երիտասարդությունը «խելքի կգա և պահանջ կներկայացնի՝ վերացնելու անօրինական, ապօրինի ընդունելության կարգը»:
«Օրենքով սահմանվում է, որ ընդունելությու նը բուհի իրավասությունն է: Եվ բացի դրանից՝ սահմանվում է, որ բուհերի իրավասությանը խթանելն ու աջակցելը պետական քաղաքականության սկզբունք է: Այսինքն՝ պետությունը պետք է խթանի, զարգացնի մասնավոր բուհերը, բայց իրականությունը ցույց է տալիս, որ նրանք թքած ունեն օրենքի վրա: Տերն իրենք են, բակլան խաշած են ցանում: Այս «քաղաքականությունը» սկսվեց Աշոտյանից ու շարունակվում է մինչև հիմա»։
Մակիչյանը նաև նշեց, որ առաջիկայում, երբ ԱԺ-ում կքննարկվի բարձրագույն կրթության մասին նոր օրենքը, իրենք պատրաստվում են մանրամասն ներկայացնել այս խնդիրները և պահանջել հարգել ու արժևորել օրենքը: «Մինչև օրենքը չարժևորվի, օրենքի նկատմամբ պաշտամունք չստեղծվի, մենք չենք կարող հզոր երկիր ունենալ: Բայց ոչ ոք չի խոսում դրա մասին: Մի առիթով ես եմ խոսում, մի ուրիշ առիթով՝ Ջհանգիրյան Ժորան, իսկ մնացածը լուռ սպասում են, թե ինչ է լինելու, և իրենց գլխին ինչ է գալու»:
«Գլաձոր» համալսարանի ռեկտոր Ժորա Ջհանգիրյանը առհասարակ չցանկացավ խոսել այս թեմայով:
Լուսանկարը՝ armeniasputnik.am-ի
