Քրդական հակաահաբեկչական ուժերի բարձրաստիճան ներկայացուցիչ Լահուր Թալաբանին հայտարարել է, որ ԴԱԻՇ խմբավորման պարագլուխ Աբու Բաքր ալ Բաղդադին, ամենայն հավանականությամբ, ողջ է և գտնվում է Ռաքքա քաղաքից հարավ։ Այս մասին փոխանցում է Reuters գործակալությունը:
Թալաբանին գործակալությանը հայտնել է, որ դրանում վստահ է 99 տոկոսով։
Երեկ այն մասին, թե ալ Բաղդադին թաքնվում է Ռաքքայի արվարձանում, հայտարարել էր Իրաքի տեղեկատվության և ահաբեկչության դեմ պայքարի վարչության ղեկավար Աբու Ալի ալ Բասրին: Այդ քաղաքը մինչ օրս մասնակիորեն գտնվում է զինյալների վերահսկողության ներքո:
Հուլիսի 11-ին հաղորդվել էր, որ խմբավորումը հաստատել է ալ-Բաղդադիի մահվան մասին տեղեկությունը։ Այն մասին, որ ԴԱԻՇ-ի առաջնրդը, հավանաբար, սպանվել է ՌԴ ավիացիայի հարվածի արդյունքում մայիսի 28-ին, Ռաքքայի մոտ, հունիսի 16-ին հայտնել էր ՌԴ ՊՆ-ն։