1835 թվականին կառուցված հայկական եկեղեցին Սինգապուրի ամենահին քրիստոնեական եկեղեցին է: Այն այցելության արժանի գեղեցիկ վայր է, որը հանդիսանում է 19-րդ դարում Սինգապուրում հայկական համայնքի ազդեցության վկայություն։ 1819 թվականին, երբ Սինգապուրը վերածվեց առևտրային նավահանգստի, հայերը Սինգապուր ժամանած ամենաառաջին առևտրականներից էին։ Այս մասին գրում է mothership.sg-ն։
Չնայած այն բանին, որ հայերը սակավաթիվ էին, նրանք սկսեցին կրոնական արարողություններ անցկացնել 1820-ական թվականներից։ Սկզբում այդ արարողություններն անցկացվել են Կոմերցիոն հրապարակի ինքնաշեն մատուռում, սակայն այնուհետև բրիտանական իշխանությունները դիմումի հիման վրա հող հատկացրին Fort Canning Hill-ում՝ եկեղեցու կառուցման համար։
Վերևից նայելիս կառույցը խաչ է հիշեցնում։ Եկեղեցին նախագծել է Գ.Դ. Քոլմանը։ Դիզայնում նա ներառել է հայկական ավանդական ճարտարապետության որոշ առանձնահատկություններ։ Եկեղեցին հարմարեցված է Սինգապուրի արևադարձային կլիմային. ունի բավականաչափ դռներ ու պատուհաններ՝ ներսի օդափոխության ապահովման համար։ Ինտերիերը տարբերվում է շնջանաձև դիզայնով։ Նշվում է, որ այն միակ եկեղեցին է Սինգապուրում, որն ունի շրջանաձև ինտերիեր։
Եկեղեցին ունի նաև հուշայգի, որտեղ ամփոփված են Սինգապուրի նշանավոր հայերը։