Հայ տղամարդն Անապայում մահացել է սրտի կաթվածից` փորձելով փրկել խեղդվող 5-ամյա դստերը, հայտնում է Bloknot-krasnodar.ru-ն:
Վիտյազևո բնակավայրի շրջանում փրկարարները ջրից դուրս են բերել տղամարդու ու նրա դստեր դիերը։ Ողբերգական դեպքը տեղի է ունեցել հուլիսի 8-ին։
Նշվում է, որ Գարիկը որդու՝ Դավիթի, ու դստեր՝ Դիանայի հետ զբոսնում էր կատամարանով։ Կատամարանը բլրակ ուներ: Դավիթը դրա վրայով սահում էր ջրի մեջ, որտեղ որդուն բռնում էր հայրը: Զվարճանալու պահին կատամարանի մյուս կողմից ծովն է նետվել նաև Դիանան:
«Գարիկը ջրից հանել է որդուն, լողալով հասել դստերը, սակայն նա արդեն չկար: Նա մի քանի անգամ սուզվել է ջրի մեջ, սակայն նրան չի գտել: Նա օգնություն է կանչել: Բոլորը բղավում էին, ձեռքերը թափահարում` փորձելով գրավել ափին գտնվողների ուշադրությունը, բայց բոլորի համար միևնույն էր: Նա մահացել է սարսափից և խուճապից: Նրա սիրտը պայթել է այն պատճառով, որ չի կարողացել աղջկան գտնել»,-պատմել են հարազատները։
Ընտանիքի մտերիմները կարծում են, որ եթե փրկարարները շուտ արձագանքեին, հնարավոր կլիներ կանխել միջադեպի ողբերգական հետևանքները։
