Հայաստանի էներգետիկ ոլորտում ներդրումների, էներգետիկ անկախացման մասին են խոսում ԱՄՆ դեսպանը, ԵՄ դեսպան Պյոտր Սվիտալսկին: Այս հայտարարությունների անարձագանք մնալը, ըստ ԵՄԱ նախագահ Բորիս Նավասարդյանի, պայմանավորված է նրանով, որ Հայաստանի ընդդիմադիր և իշխանական ուժերը հակված են հետևել ռեալ պոլիտիկ սկզբունքին, բայց սա սխալ է ընկալվում մեր քաղաքական վերնախավի կողմից, այն է՝ մեզնից ոչինչ կախված չէ, աշխարհաքաղաքական զարգացումները գերիշխում են, և մենք պետք է այնպես անենք, որ այդ փոփոխություններից ամենաքիչը տուժենք. «Դա խանգարում է այնպիսի քաղաքականությանը, որը ենթադրում է որոշակի համարձակ քայլեր, որոշակի ստատուս-քվոյի փոփոխություններ: Եվ սա Հայաստանի զարգացման համար լուրջ խոչընդոտ է: Եթե մենք փորձենք վերլուծել և գտնել զարգացման համար կարևոր ուղղություններ, մենք կգտնենք նաև այլընտրանքային, եթե չփնտրենք, երբեք այլընտրանքը չենք գտնելու ո՛չ էներգետիկ անվտանգության, ո՛չ էլ ընդհանուր անվտանգության ոլորտում»,- ասաց Բորիս Նավասարդյանը:
Նրա խոսքերով՝ այս ստատուս-քվոն բերում է նրան, որ հայկական բիզնեսը հարմարվում և շահեր է կարողանում իր համար պահել հենց այս իրավիճակից. «Ցանկացած փոփոխություն ռիսկային է իրենց համար, քանի որ կարող է բերել այդ եկամուտների նվազմանը»,- ասաց նա:
Անդրադառնալով դիտարկմանը, թե ինչու վարչապետ Կարեն Կարապետյանն այս ամիսներին որևէ անգամ ԵՄ չհրավիրվեց, մինդեռ Սերժ Սարգսյանը քանիցս գնաց այս ընթացքում, Բորիս Նավասարդյանն արձագանքեց. «Մենք դժվար թե այս հարցում մեր քաղաքական վերնախավում ունենանք լուրջ հակասություններ: Կարծում եմ՝ մոտեցումները մոտավորապես նույնն են, խոշոր խաղացողներն իրար մեջ դերեր են բաժանում՝ ով ում հետ է աշխատում: Որքանով է դա արդյունավետ աշխատում, դեռ կտեսնենք, բայց ես կգերադասեի, որ Հայաստանը, որպես պետություն՝ անկախ անձերից ունենար իր հստակ դիրքորոշումները»:
Հարցազրույցն ամբողջությամբ՝ տեսանյութում: