«Հանդիպումն, ընդհանուր առմամբ, կարևորում ենք։ Մեր հիմնական ակնկալիքն այն էր, որ ևս մեկ անգամ շեշտվի խաղաղ բանակցությունների շարունակության կարևորությունը, խաղաղության ու կայունության պահպանումը։ Այս ամենը կարևորվել է նաև միջազգային հանրության կողմից»,- «Առաջին լրատվական»-ի հետ զրույցում անդրադառնալով Բրյուսելում կայացած Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հանդիպմանը՝ ասաց ԼՂՀ նախագահի աշխատակազմի ղեկավար Դավիթ Բաբայանը։
Շարունակելով՝ Բաբայանն ասաց. «Վարդագույն ակնոցներով չենք նայում զարգացումներին, գիտենք՝ ինչն է հնարավոր, ինչը՝ ոչ։ Պետք է քայլեր ձեռնարկվեն Վիեննայի ու Սանկտ Պետերբուրգի պայմանավորվածությունները կյանքի կոչելու համար, այսինքն՝ մեխանիզմները պետք է ներդրվեն»,- ասաց մեր զրուցակիցը։
Դավիթ Բաբայանը հավելում է. «Մյուս կողմից՝ տեսնում ենք նաև պաշտոնական Բաքվի ապակառուցողական դիրքորոշումը և տեսնում ենք, որ պաշտոնական Բաքուն իհարկե չի կարողանում տապալել բանակցային գործընթացը վերջնականապես, բայց այն, որ խոչընդոտում է և կոնկրետ քայլեր չի ուզում ձեռնարկել՝ դա էլ է ակնառու կերպով դրսևորվում»։
Մեր այն դիտարկմանը, թե ակնկալվում էր, որ հանդիպման ընթացքում պայմանավորվածություն ձեռք կբերվի նախագահաների հանդիպման հետ կապված, Բաբայանն արձագանքեց. «Նախագահների հանդիպման հտ կապված չկա հստակություն, բայց սեպտեմբերին լինելու է արտգործնախարարների ևս մեկ հանդիպում, գուցե այդ ժամանակ լինի կոնկրետ պայմանավորվածություն։ Կարծում եմ՝ դա հնարավոր է, պետք է պարզապես սպասենք»։
