Արաբական Al Aan TV հեռուստաալիքի թղթակից Ջենան Մոուսսան ռեպորտաժ է պատրաստել սիրիահայ Սարգսի մասին, ով մնացել է ապրելու Էթ-Թել-էլ-Աբյադ բնակավայրում, երբ բնակավայրն անցել է ԴԱԻՇ-ի վերահսկողության տակ:
Երբ գրոհայինները գրավել են բնակավայրը և սկսել քանդել շենքերը, Սարգիսը որոշել է մնալ՝ իր տունը փրկելու: Նա սկսել է ապրել ԴԱԻՇ-ի սահմանած կանոններով՝ տարեկան 200 դոլար է վճարել՝ ոչ մուսուլմանների համար նախատեսված կեցության հարկ, իրավունք է ունեցել երթևեկել հանրային տրանսպորտով, բայց միայն հետևի նստատեղերին:
Սարգիսը փորձել է վերականգնել Էթ-Թել-էլ-Աբյադի հայկական կիսաքանդ եկեղեցին, որի մոտ ապրել է, բայց գրոհայինները սկսել են եկեղեցին որպես Թալ-Աբյադում իրենց շտաբ-բնակարան օգտագործել և այնտեղ մարտիկների համար շարիաթի դասեր են անցկացրել. գրատախտակին մնացել են դասերի ժամանակ արված գրառումները: Գրոհայինները հայկական եկեղեցու մոտ մի քանի վանդակ են դրել, որտեղ կտտանքների են ենթարկել գերիներին: Նրանք իրենց երեխաներին թույլ են տվել քարեր նետել գերիների վրա:
Սարգիսը բազմիցս տեսել է, թե ինչպես են ԴԱԻՇ-ի գրոհայինները մարդկանց մահապատժի ենթարկում հայկական եկեղեցու մոտ:
Հունիսին բնակավայրը, որտեղ ապրել է սիրիահայը, գրոհայիններից ազատագրվել է քրդական զինված ջոկատների կողմից, բայց հիմա տեղի բնակիչները վախենում են թուրք զինվորների ներխուժումից, նշում է լրագրողը: