Հայ մեծանուն ռեժիսորներ Ֆրունզե Դովլաթյանի, Յուրի Երզնկյանի և Սերգեյ Իսրայելյանի հիշատակը հավերժացնող աստղերը նոր շունչ հաղորդեցին Շառլ Ազնավուրի անվան հրապարակին: Աստղերի բացման հանդիսավոր արարողությունը տեղի ունեցավ հուլիսի 9-ին՝ «Ոսկե ծիրան» միջազգային կինոփառատոնի շրջանակում:
«Նրանց պայծառ երևակայությամբ ֆիլմերը, վառ կերպարները ևս մի քանի սերունդների հիշողության մեջ կմնան: Այդ ռեժիսորների կինոնկարների շնորհիվ կարողացան ձևավորել այն սերունդը, որն ի վիճակի եղավ կառուցել ու շենացնել մեր անկախ հայրենիքը»,-նշեց ՀՀ մշակույթի նախարար Արմեն Ամիրյանը:
Երևանի թատրոնի և կինոյի պետական ինստիտուտի ռեկտոր, կինոգետ Դավիթ Մուրադյանի խոսքով` կինոն վերացական բան չէ, կինոն մարդիկ են: «Մեր մուտքը կինոարվեստ զուգադիպեց այդ մեծանուն աստղերի գործունեության տարիների հետ: Ուստի մենք դաստիարակվեցինք և մեր գեղարվեստական ճաշակը ձևավորեցինք նրանց ազդեցությամբ: Հենց այդ կինոռեժիսորները ստեղծեցին այն հայկական կինոարվեստը, որն այսօր մեր հպարտությունն է և մինչև օրս սիրված բոլոր սերունդների կողմից»,- եզրափակեց նա:
Աստղերի բացմանը ներկա էին Ֆրունզե Դովլաթյանի, Յուրի Երզնկյանի և Սերգեյ Իսրայելյանի հարազատները: