Միասնական քննությունների երկրորդ փուլում դիմորդները հանձնել են քննություն հայոց լեզու և գրականություն, ռուսաց լեզու, ֆիզիկա, օտար լեզու, մաթեմատիկա, կենսաբանություն, քիմիա և հայոց պատմություն առարկաներից։
Առաջին փուլի արդյունքների համեմատ՝ երկրորդ փուլի ընդհանուր արդյունքները բավականին ցածր են։ Մասնավորապես՝ ռուսաց լեզու առարկայից անբավարար են ստացել դիմորդների 44 %-ը, իսկ ամենաբարձր միավորն այս առարկայից եղել է 17, որը ստացել է ընդամենը մեկ հոգի, մնացածները ստացել են 7․5-13 միավոր, հայոց լեզու և գրականությունից՝ 30 % անբավարար, իսկ միջին միավորը եղել է 10-ը, ֆիզիկայից անբավարար են ստացել մոտ 50 %-ը, իսկ միջին միավորը եղել է 9-ը, օտար լեզուների միջին միավորը՝ 11․5, իսկ անբավարար ստոցողների քանակը՝ մոտ 20 %, կենսաբանություն առարկայից՝ միջին միավորը 10․7 է, 3 դիմորդ ստացել է 20 միավոր, իսկ անբավարար ստացողների թիվը կազմել է 29․5 %, մաթեմատիկայից միջին միավորը եղել է 9.7 բալ, առավելագույն 20 միավոր ստացել է ընդամենը 2 դիմորդ, իսկ անբավարար ստացողների քանակը՝ 40 %։
Երկրորդ փուլի նման պատկերն ու հատկապես անբավարարների մեծ տոկոսը ԳԹԿ տնօրեն Արա Իսպիրյանը պայմանավորում է դիմորդների պատրաստվածության ցածր մակարդակով։
Հիշեցնենք, որ երկրորդ փուլում քննություն հանձնում են հիմնականում բանակից զորացրված երիտասարդները, քոլեջների և միջին մասնագիտական հաստատությունների դիմորդները և արտերկրից եկած մեր հայրենակիցները, ովքեր ուզում են ուսումը շարունակել Հայաստանում։
«Ընդհանրապես միշտ էլ երկրորդ փուլի արդյունքներն ավելի ցածր են եղել, քան առաջին փուլինը, իսկ նախորդ տարվա երկրորդ փուլի համեմատ այս տարի էլ պատկերը գրեթե նույնն է»,- «Առաջին լրատվական»-ի հետ զրույցում նկատեց ԳԹԿ տնօրենը։
Վերջինիս տեղեկացմամբ՝ երկրորդ փուլի համար հայտարարագրվել է 981 դիմորդ, որոնցից 200-ն առաջին փուլին չմասնակցած դիմորդներն են, ովքեր տարբեր պատճառներով չէին կարողացել ներկայանալ քննությանը։
«Յուրաքանչյուր առարկայից էլ եղել են բացականեր, քանի որ կան դիմորդներ, ովքեր մի քննությունն անբավարար ստանալու պարագայում, այլևս չեն ներկայանում մյուս քննություններին»,- ասաց Արա Իսպիրյանը։