Ճանաչողական այցով Ախալքալաք է այցելել ԱՄՆ-ի Կալիֆորնիա նահանգի Գլենդել քաղաքի քաղաքային խորհրդի անդամ Զարեհ Սինանյանը: jnews.ge-ի փոխանցմամբ՝ հյուրերին Ախալքալաքի Սուրբ Խաչ եկեղեցու դարպասների մոտ աղ ու հացով դիմավորել են Վաչիան պարային համույթի սաները: Այնուհետեւ Ջավախքի ընդհանուր առաջնորդական փոխանորդ Տեր Բաբգէն վրդ Սալբիյանի գլխավորությամբ հյուրերը ծաղիկներ են խոնարհել Հայոց ցեղասպանության զոհերի հիշատակը հավերժացնող խաչքարին:
ԱՄՆ-ի Գլենդել քաղաքի քաղաքային խորհրդի անդամ Զարեհ Սինանյանի խոսքով՝ այցը զուտ ճանաչողական բնույթ է կրել, նպատակն է եղել ծանոթանալ համայնքի խնդիրներին: Ըստ նրա՝ խնդիրները ինչպես ամենուր, սոցիալական բնույթի են, ճիշտ է կան որոշակի լուրջ խնդիրներ կապված դպրոցական կրթության հետ, սակայն ամենացավալին արտագաղթի օր-օրի աճող թիվն է:
«Որոշ ուսուցիչներ բողոքեցին, որ հայոց լեզվի դասաժամերն են քիչ եւ այլն, բայց այդ մասին ես նախօրոք էլ տեղյակ էի: Բայց ամենավատ բանին, որ ականատես եղա, դա հայերի արտահոսքն է: Որոշ թվեր ներկայացրերցին, որ իրոք ահագնացող է, մի դպրոցում 80-ականներին սովորել է 1200 աշակերտ, հիմա նույն դպրոցում միայն 100: Սա է ամենամտահոգիչը», – նշեց Գլենդելի քաղաքային խորհրդի անդամը:
Զարեհ Սինանյանը նշել է, որ Սփյուռքը պետք է ուշադրություն դարձնի նաեւ Ջավախքի խնդիրների լուծմանը.
«Ախալքալաքում ճանապարհների վիճակը մտահոգիչ է, մանավանդ Հայաստանից Ախալքալաք ճանապարհը շատ բարձիթողի վիճակում է գտնվում: Ես կուզենայի, որ Սփյուռքը, ինչպես վերաբերվում է Հայաստանին ու Արցախին, նույն ձեւի էլ Ջավախքին սրտացավ մոտեցում ցուցաբերի: Ես դեռ չգիտեմ կոնկրետ մենք ինչ կարող ենք անել, բայց կաշխատենք անպայման», – ասաց Զարեհ Սինանյանը:
