Apple կորպորացիան նոր տեխնոլոգիա է փորձարկում, որը թույլ կտա iPhone-ի օգտատերերին հանել սարքի արգելափակումը դեմքի 3D սքանավորման միջոցով: Այդ մասին հայտնում է Bloomberg գործակալությունը՝ վկայակոչելով սեփական աղբյուրներին:
Գործակալության աղբյուրների տեղեկություններով՝ օգտատերերը կկարողանան օգտվել սքանավորումից համակարգ մտնելու, վճարումներ անելու և հավելվածները գործարկելու համար: Նշվում է, որ Apple-ը փորձարկում է նաև աչքի ցանցաթաղանթի սքանավորումը:
Ինչպես հաղորդվում է՝ սքանավորումը կիրականացվի վայրկյանից էլ պակաս ժամանակում: Ընդ որում՝ հեռախոսն այդկերպ արգելափակումից հանելը հնարավոր կլինի անգամ այն դեպքում, եթե սարքը դրված լինի սեղանին, այլ ոչ անմիջապես օգտատիրոջ դեմքի մոտ:
Տեխնոլոգիան հնարավոր է՝ ներդրվի սմարթֆոնի նոր մոդելում, սակայն դրա ներդրման ժամկետների մասին հստակ տեղեկություն դեռ չկա:
